Аерылышканнан соң Ләйлә һәм Рөстәм Галиевларның балалары кем белән калган?

Шушы көннәрдә җырчы Ләйлә Галиева тормыш иптәше Рөстәм Галиев белән аралары өзелү турында хәбәр иткән иде. Иҗади парның юллары 15 ел бергә гомер кичергәннән соң аерылган.

• «15 ел бергә яшәдек!» – Ләйлә һәм Рөстәм Галиевлар аерылышкан

«Безнең тарихка нокта куелды. Без Рөстәм белән аерылыштык. Безнең икебез өчен дә хәзер тормышта яңа этап башлана. Ләкин, бернигә карамыйча, безгә алга барырга кирәк», – дип язды ул социаль челтәрләрдә. Шунысын да билгеләп үтәргә кирәк, Ләйлә Галиева аерылышуларыннан вакыйга ясамады, аны үз файдасына кулланмады.

Халык Ләйләнең бу посты янында бик күп комментарийлар калдыра. Әлбәттә инде, барысының да әлеге матур гаиләнең таркалу сәбәпләрен беләселәре килә. Ләйлә белән Рөстәм 2 кыз тәрбиялиләр. Җырчының тамашачысын балаларның киләчәге, аларның алга таба кем янәшәсендә үсәчәге дә борчый.

Ләйлә әлегә язылучыларының сорауларына җавап бирми. Шуңа: «Балалар кем белән калды? Әти-әниләренең бу карарын ничек кабул иткәннәр икән?» – дигән сорауга Ләйлә белән Рөстәмнең олы кызы Риана үзе җавап кайтарырга булган. Аның сүзләренчә, кызлар икесе дә әниләре янәшәсендә калуны сайлаганнар.