Әлмәт Башкарма комитеты башлыгын кулга алганнар
Кичә Чаллыда Әлмәт Башкарма комитеты башлыгы – 42 яшьлек Айнур Исхаковны кулга алдылар. Ул әлеге вазифаны 2021 елның июненнән бирле башкара, дип яза «Челнинские известия».
Айнур Исхаковның гамәлләрендә РФ Җинаять кодексының 159нчы маддәсенең 4нче өлеше (аеруча зур күләмдә мошенниклык кылу) буенча җинаять составы билгеләре табылган. Аны 2017 елда шәһәр казнасыннан 2,6 миллион сум акча урлауда шикләнәләр.
Ул вакытта Исхаков Башкарма комитетның Экология һәм табигатьтән файдалану департаментын җитәкли иде. Тикшерү версиясе нигезендә, аның җитәкчелегендә Әлмәт районындагы 5 карьерны рекультивацияләүгә контракт төзелгән. Әмма проект тормышка ашырылмый калган.