Seleznöv: «Putinniñ tehnikanı qaytaruv aqqında beyanatı – «faydalı sanktsiyalar»nıñ neticesidir»
Ukraina Mudafaa nazirligi yanındaki media merkeziniñ sabıq hadimi Vâçeslav Seleznöv, Rusiye prezidenti Vladimir Putinniñ Kyivge yarımadadan Ukrainağa ait arbiy tehnikasınıñ altıp berilmesi aqqında beyanatı – «faydalı sanktsiyalar»nıñ neticesidir», dep saya. Bu fikirni Seleznöv yanvarniñ 12-sinde Qırım.Aqiqat içün bergen izaatlarda bildirdi.
Seleznöv: «Men samimiyetle ümüt etem ki, şimdi ortağa qoyulğan meseleler boş bir yerde degil de, halqara toplulığıñ şahsen Putinge ve umumen Rusiyege qarşı qullanğan «faydalı sanktsiyalar» neticesinde peyda oldı. Ümüt etem ki, bu sadece ceryannıñ başlanğıçıdır, bu ceryan devam etecek ve biz, bütün medeniy dünya beklegen neticege (Qırımnıñ deokkupatsiyasına – QA) irişirmiz», – dedi.
Aytqanına köre, Kyiv şimdi yalıñız tehnikasınıñ degil, bütün arbiy mal-mülküniñ qaytarılması meselesini ortağa qoymaq kerek.
O: «Putin Ukraina Silâlı quvetleriniñ (USQ) mal-mülküni qaytaruv teşebbüsini yapqan olsa, buña cevaben diger mal-mülkniñ, misal içün, arbiy qasabalar ve umumen ilhaq etilgen Qırımnıñ qaytarılması ve devletimizniñ şarqında arbiy areketlerniñ toqtatılması meselelerini ortağa qaymaq kerek», – dep tüşüne.
Seleznöv, yarımadadan tehnikanıñ qaytarılması içün «devletimizniñ arbiy-siyasiy qararı kerek», dep ilâve etti.
Yanvarnıñ 11-nde Rusiye presidenti Vladimir Putin, Rusiyeniñ ilhaq etilgen Qırımdan Ukrainağa onıñ arbiy tehnikasını qaytarmağa azır olğanını bildirdi.
Buña cevaben Ukraina Silâlı quvetleriniñ Arbiy deñiz quvetleri komandanı İhor Voronçenko, Putinniñ tehnikanı qaytarmaq teklifi boyunca Ukraina rehberleri qarar berecek, dedi.
2017 senesiniñ dekabrinde sabıq Ukraina halq deputatı Andrey Sençenko, 2014 senesinde, Qırımnıñ Rusiye tarafından ilhaq etilmesi esnasında, yarımadadan silâlarnıñ çıqarılması ve arbiy hadimlerniñ qorantaları ile kursantlarnıñ evakuatsiya etilmesi aqqında muzakereler etkenini söylegen edi. Onıñ aytqanına köre, o, 3502 miqdarda arbiy tehnika ve silânıñ çıqarılmasını temin etti. Olarnıñ soñki qısmı 2014 senesi iyünniñ 16-sında yüklenip çıqarılğan edi.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar tatbiq etti. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.