Cemilev: UNESCO baş mudirine muracaat Qırımda medeniy mirasnıñ qorçalanması içün bir adım olacaq

Ukrainanıñ UNESCO işleri boyunca milliy komissiyası yanvarniñ 19-nda ilhaq etilgen Bağçasarayda Han sarayınıñ saqlanması boyunca mahsus mevzulı oturışuv keçirdi. Ukraina prezidentiniñ qırımtatar halqınıñ işleri boyunca vekili Mustafa Cemilevniñ qayd etkenine köre, UNESCO baş mudiri Odri Azulege muracaat «vaqtınca ilhaq etilgen Qırımda medeniy mirasnıñ qorçalanmasına doğrultılğan adımlardan biri olacaq».


Cemilev Facebookta: «Mutehassıslarnıñ fikrine köre, Han sarayı kompleksiniñ eñ eski binalarından biri olğan Büyük Han camisinde işğalciler tarafından yapılğan işler bu abideniñ qısmen asıl şeklini coymasına ketirdi», – dep qayd etti.


Muzakerege Ukraina Tış işleri nazirligi, halq deputatları, Medeniyet nazirligi, İnformatsion siyaset nazirligi, Vaqtınca işğal etilgen territoriyalar meseleleri boyunca nazirlik ve Qırım Muhtar Cumhuriyeti  prokuraturası qoşuldı.


Bağçasaraydaki Han sarayında Qırımnıñ Rusiyege tabi akimiyetiniñ teşebbüsinen yapılğan qazağa qarşı işler devam ete. Şaatlarnıñ bildirgenine köre, saraynıñ baş binası etrafında ağır demir karkas qurula. Onı üstten qoruma damınen örtecek olalar.


Mutehassıslar, konstruktsiyanıñ ağırlığından topraq çökmek mümkün, dep qorqa. Ondan ğayrı, işçiler mezar sanduqaları ve caminiñ kalligrafik yazılarını muafaza etmek içün mahsus qorumalar qoymadı. Qadimiy ağaç pekitmeleri üstüne ise asıl da beton töktiler.


Daa evel Qırım adliyecileri ve advokatları Bağçasarayda Han sarayını qorçalav boyunca uquqiy kampaniyanı başlamaq niyetinde olğanlarını bildirdiler.