Qırımnıñ ukümeti 2018 senesinde yarım biñ medeniy tedbir keçirmek niyetinde

Kremlniñ kontroli altında olğan Qırım Medeniyet nazirligi, 2018 senesinde yarımadada 500-den ziyade tedbirniñ  keçecegini bildirdi.

Qırımdaki Rusiye ukümetiniñ saytında bildirilgenine  köre, cedvelge festivaller, sergiler, konferentsiyalar, kütleviy medeniy tedbirler ve bayramlar, yarışlar ve kösterüvler, teatr oyunları ve kontsert programmaları, aqşamlar ve körüşüvler  kire.

Ukümet saytı: «Bu yılda Kezlevde, devlette çıqqan kinofilmlerni Rusiyeniñ yetişip kelgen nesili ve gençleri arasında populârlaştırğan «Solneçnıy ostrov» («Küneşli ada») bala ve aile kinosınıñ açıq festivali tekrar keçecek. Yaltadaki «Yevraziyskiy most» («Avrasiya köpüri») halqara festivali – meraqlı ve perspektivalı medeniyet adisesidir. Ve ondan ğayrı, yañı bir «Krım Dok» açıq Qırım vesiqalı filmler festivali keçecektir», – dep, Qırım Medeniyet nazirliginiñ yolbaşçısı Arina Novoselskayanıñ sözlerini naqil ete.

Ondan ğayrı, messisede, «milliy-vatanperverlik ve ahlâqiy-estetik yönelişli» tedbirlerniñ ötkerilmesi planlaştırılğanını qayd ettiler. Olarnıñ arasında «Alminskoye delo» («Almadaki iş») arbiy-tarihiy festival ve «Voloşinskiy sentâbr» («Voloşin sentâbri») ilmiy-icadiy simpozium yer almaqta.

2017 senesiniñ sentâbrinde Qırım ükümeti, ekinci «Yevraziyskiy most» Yalta kinofestivali içün ilhaq etilgen Qırımnıñ büdjetinden 13 mln ruble (qararnen 5,9 million hrivna) ayırılğanını bildirdi. Bu, 2016 senesiniñ köstergiçlerinden eki qat ziyadedir.

Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalarnı tatbiq etti. Rusiye, yarımadanı işğal etkenini red etip, buña «tarihiy adaletniñ tiklenüvi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.