Rusiye, Ukraina gemisine qarşı silâ qullandı, bir kişi yaralandı – Ukraina prezidentiniñ Qırım Muhtar Cumhuriyetindeki daimiy temsilcisi
Rusiye, Ukraina gemisine qarşı silâ qullandı, bir yaralanğan insan bar, dep bildirdi Ukraina prezidentiniñ Qırım Muhtar Cumhuriyetindeki daimiy temsilcisi Boris Babin.
«Keriç boğazınıñ çıqışında Rusiye Ukraina Arbiy deñiz quvetleriniñ gemisine qarşı silâ qullandı. Gemide yaralanğan kişi bar. Ukraina silâlı quvetleri Arbiy deñiz quvetleri yardım tedbirlerini ala. Bundan evel Rusiye, Arbiy deñiz quvetleriniñ gemileri Qırım yanında işğal etilgen «Rusiye deñizinden» çıqqanda silâ qullanılacaq, dep bildirgen edi», – dep yazdı Babin Facebook saifesinde.
Onıñ malümatına köre, Rusiye Silâlı quvetleri «Ukraina Arbiy deñiz quvetleriniñ katerlerini zapt etmekte».
Bu malümatnı Ukraina Arbiy deñiz quvetleriniñ matbuat hızmeti de tasdıqlay.
Rusiye tarafınıñ adisenen bağlı izaatları daa yoq.
Noyabrniñ 25-nde Ukraina Arbiy deñiz quvetleri bildirdi ki, Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Daa soñra Rusiye Keriç boğazını vatandaş gemileriniñ keçmesi içün qapattı. Aynı vaqıtta, Rusiye üç gemisini Keriç boğazından yiberdi, amma Ukraina gemileriniñ Azaq deñizine keçişini blok etmege devam etti.
Rusiye kütleviy haber vastaları, adise sebebinden Keriç boğazına «bir qaç Rusiye arbiy uçağı nezaret içün» yollanılğanını bildirdi.
Ukraina Tış işler nazirligi Rusiyeniñ noyabrniñ 25-nde Qara ve Azaq deñizlerinde yapqanlarını tenqit etti.
Keçenleri Avropa parlamenti Rusiyege qarşı sanktsiyalarnı quvetleştirmege ve Ukrainada deñiz taşımacılığı saasında OSCE missiyasınıñ işini kenişletmege çağırğan qararnı qabul etti.
Bu sene sentâbrniñ 6-nda Ukraina milliy telükesizlik ve mudafaa şurası Azaq deñizinde arbiy-deñiz bulunmasını quvetleştirmege qarar aldı.
Soñki vaqıtları Azaq deñizi Rusiye uquq qoruyıcıları, birinciden Ukraina limanlarına ketken ve andan kelgen gemilerni tutqan sıñırcıları, tarafından yapılğan provokatsiyalarnıñ yeri oldı.