Ukraina konsulı qırımlı Zeytullayevni Rusiye koloniyasında ziyaret etti
Rusiyeniñ Salavat şeerindeki (Başqortıstan) koloniyada tutılğan qırımlı Ruslan Zeytullayevni dekabrniñ 21-nde Ukraina konsulı ziyaret etti. Bu aqta «Qırım birdemligi» birleşmesi haber ete.
Faallerniñ malümatına köre, Zeytullayev onıñ adresine çetel mektüpleriniñ kelmesi meselesinde yardım istedi, çünki soñki vaqıtları olarnı almay eken.
Haber etile ki, Ukraina konsulı koloniya reberliginden Zeytullayevge ömür arqadaşınen uzun körüşüv aqqı berileceginden tasdıq cevabını aldı, apayınıñ kelmesi 2018 senesi dekabr ayına planlaştırıla.
Zeytullayev Rusiyede ve işğal etilgen Qırımda yasaqlanğan «Hizb ut-Tahrir» teşkilâtınıñ bölügini teşkil etkeninde qabaatlanıp mahküm etilgen edi.
2017 senesi iyül ayında Rusiye Yuqarı mahkemesi Zeytullayevniñ apis müddetini 15 yılğa arttırdı. Buña cevap olaraq Aqyar sakini açlıq ilân etti.
Ukraina Tış İşler Nazirligi müddetniñ arttırmasına qarşı narazılıq bildirdi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, maqsatqa bu irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.