მთელს უკრაინაში დაიგზავნა მუქარის წერილები შენობების "დანაღმვის" შესახებ
უკრაინის ეროვნულმა პოლიციამ განაცხადა, რომ გამოძიებას აწარმოებს. მან არ გამორიცხა, რომ ამ გზით „მტერი ცდილობს ჩვენი სახელმწიფოს რეგიონებში სიტუაციის დესტაბილიზაციას და, შესაბამისად, ამისთვის იყენებს საინფორმაციო-ფსიქოლოგიურ სპეცოპერაციებს“.
რადიო თავისუფლების უკრაინული სამსახურის ცნობით, წერილებს ხელს აწერს წარმომადგენელი „ტერორისტული ჯგუფისა“, რომელსაც იგივე სახელწოდება აქვს, რაც პრორუსულ ტელეგრამის არხს, რომელიც შეიცავს მოწოდებებს უკრაინელი სამხედროებისა და სამხედრო კომისარიატების თანამშრომელთა მანქანების დაწვის შესახებ. გარდა ამისა, წერილში მოცემულია რადიო თავისუფლების უკრაინული სამსახურის ჟურნალისტების, ირინა სისაკისა და ვალერია ეჰოშინას, და შტატგარეშე თანამშრომლის, იულია ჰიმერიკის სახელები. წერილების ავტორები მათ აკისრებენ პასუხისმგებლობას იმისთვის, რომ ჯგუფი სავარაუდოდ ამზადებს ტერორისტულ თავდასხმებს.
აღნიშნული ჟურნალისტები არიან ავტორები ახლახან გამოქვეყნებული გამოძიებისა, რომელშიც ნათქვამია, რომ რუსეთის სპეცსამსახურები იბირებენ უკრაინის მოქალაქეებს, მათ შორის არასრულწლოვანებს, რომ მათ გასამრჯელოსთვის ცეცხლი წაუკიდონ ავტომანქანებს. რადიო თავისუფლების პროექტმა „სხემიმ“ დაადგინა, რომ პირი, რომელსაც იგივე მონაცემები აქვს, რაც მუქარის წერილების გამგზავნს, ცხოვრობს ანექსირებულ ყირიმში და აქვს რუსეთის პასპორტი. ამავე დროს, „სხემის“ თანახმად, იმ ჯგუფის სოცქსელებში, რომელმაც მასობრივი დანაღმვის შესახებ განაცხადა, ვრცელდება მოწოდებები სამხედროთა მანქანების დაწვის შესახებ 100 აშშ დოლარისა და მეტი თანხის სანაცვლოდ.
რადიო თავისუფალი ევროპა/რადიო თავისუფლების პრეზიდენტმა სტივენ კაპუსმა განაცხადა: „ჩვენ არ დავშინდებით და მხარში ვუდგავართ ჩვენს ჟურნალისტებს, რადგან ისინი აგრძელებენ უკრაინული აუდიტორიის უშიშრად და მიუკერძოებლად ინფორმირებას“. მან ასევე გამოთქვა გამოძიებაში ხელისუფლებასთან თანამშრომლობის მზადყოფნა.