ანჯელინა ჯოლიმ და ბრედ პიტმა მრავალწლიანი დავის შემდეგ მიაღწიეს განქორწინებაზე შეთანხმებას
კინოვარსკვლავებმა ანჯელინა ჯოლიმ და ბრედ პიტმა განქორწინების შესახებ შეთანხმებას მიაღწიეს, რითაც დასრულდა ჰოლივუდის ისტორიაში ერთ-ერთი ყველაზე ხანგრძლივი და საკამათო განქორწინება.
ჯოლის ადვოკატმა ჯეიმს საიმონმა Associated Press-ს დაუდასტურა, რომ წყვილმა შეთანხმებას მიაღწია.
სასამართლოში ჯერ არ არის შესული დოკუმენტები, შეთანხმება მოსამართლემ უნდა დაამტკიცოს. პიტის ადვოკატმა კომენტარის მოთხოვნას არ უპასუხა.
49 წლის ჯოლი და 61 წლის პიტი ჰოლივუდის ერთ-ერთი ყველაზე პოპულარული წყვილია 12 წლის განმავლობაში, მათგან ორი წელი ისინი დაქორწინებული იყვნენ. მათ ექვსი საერთო შვილი ჰყავთ.
ჯოლიმ განქორწინება მოითხოვა 2016 წელს, ევროპიდან კერძო თვითმფრინავით ფრენის შემდეგ. მისი თქმით, მგზავრობისას პიტი მას და მათ შვილებს სასტიკად ექცეოდა. FBI-მ და ლოს-ანჯელესის ოლქის ბავშვთა და საოჯახო საკითხების დეპარტამენტმა გამოძიება ჩაატარეს, მაგრამ მიიჩნიეს, რომ პიტის წინააღმდეგ არანაირი ზომების მიღება არ არის საჭირო.
2019 წელს მოსამართლემ ისინი განქორწინებულად გამოაცხადა, თუმცა ქონების გაყოფისა და ბავშვების მეურვეობის საკითხი ცალკე უნდა გადაწყვეტილიყო.
განქორწინების ხანგრძლივი პროცესის დროს წყვილის ექვსი შვილიდან ოთხმა ზრდასრულ ასაკს მიაღწია, რაც გამორიცხავს მეურვეობის შესახებ შეთანხმების აუცილებლობას.
2017 წელს ჟურნალ GQ-ისთვის მიცემულ ინტერვიუში პიტმა თქვა, რომ თვითმფრინავის ინციდენტისა და დაშორების დროს მას ალკოჰოლთან დაკავშირებული პრობლემა ჰქონდა, მაგრამ მას შემდეგ შეწყვიტა სმა და თერაპიის კურსი გაიარა. თვითმფრინავში თავისი საქციელი არ გაუმართლებია.
ჯოლიმაც უარი თქვა ოჯახური პრობლემების ან განქორწინების შესახებ საჯარო განცხადებების გაკეთებაზე, თუმცა ის იბრძოდა სასამართლოში პიტის საქციელის უფრო ფართოდ განხილვისთვის და გასაჯაროებისთვის.