შოლცს მასკის მხრიდან პირად შეურაცხყოფაზე მეტად აღელვებს მილიარდერის მიერ AfD-ს მხარდაჭერა
მასკმა, რომელიც აშშ-ის პრეზიდენტ დონალდ ტრამპის მხურვალე მხარდამჭერია, კანცლერს „სულელი“ უწოდა მას შემდეგ, რაც ნოემბერში დაიშალა შოლცის კოალიცია. მოგვიანებით კი მილიარდერმა გერმანიის პრესაში გამოქვეყნებულ სტატიაში მხარდაჭერა გამოუხატა AfD-ს.
ოლაფ შოლცმა, რომელიც გერმანიის სოციალ-დემოკრატიული პარტიის ლიდერია, შაბათს გერმანიის ყოველკვირეულ ჟურნალ Stern-ისთვის მიცემულ ინტერვიუში თქვა, რომ მასკის მხრიდან სოციალ-დემოკრატიული იდეების კრიტიკაში არაფერია უჩვეულო და რომ ის „აუღელვებლად“ ხვდება ამ კრიტიკას.
„ასეთ შეურაცხყოფაზე ბევრად უფრო საგანგაშო მგონია ის, რომ მასკი მხარს უჭერს ისეთ პარტიას, როგორიცაა AfD, რომელიც ნაწილობრივ მემარჯვენე-ექსტრემისტებისგან შედგება და რომელიც ქადაგებს რუსეთთან ურთიერთობების ნორმალიზებას და სურს დაასუსტოს ტრანსატლანტიკური ურთიერთობები“.
გერმანიის საშინაო დაზვერვა თვალყურს ადევნებს AfD-ს, რომელიც მემარჯვენე-ექსტრემიზმშია ეჭვმიტანილი. პარტია უკვე აღიარებულია ასეთად გერმანიის რამდენიმე ფედერალურ მხარეში.
23 თებერვალს გერმანიაში რიგგარეშე საპარლამენტო არჩევნები გაიმართება. შოლცის კოალიციური მთავრობა გასული წლის ბოლოს დაიშალა ქვეყნის ეკონომიკის გამოცოცხლებისთვის აუცილებელი გზების შესახებ დაპირისპირების გამო.
საზოგადოებრივი აზრის გამოკითხვა აჩვენებს, რომ, AfD-ს წარმატებების მიუხედავად, მის ლიდერს, ალის ვაიდელს, არა აქვს კანცლერობის რეალური შანსი, ვინაიდან ყველა დანარჩენი პარტია გამორიცხავს AfD-სთან თანამშრომლობას.