TikTok-ი აშშ-ში დაბრუნდა და ტრამპს მადლობა გადაუხადა
19 იანვარს, ღამით, სოციალური ქსელებით გავრცელებულ განცხადებაში TikTok-ი დონალდ ტრამპს მადლობას უხდის და აღნიშნავს, რომ მასთან ერთად იმუშავებს საკითხის გრძელვადიან მოგვარებაზე, რაც შესაძლებელს გახდის აშშ-ში TikTok-ის შენარჩუნებას.
იმ მიზეზით, რომ TikTok-ის მფლობელი ჩინური კომპანია ByteDance პეკინს აძლევს ამერიკელების შესახებ მონაცემების შეგროვებისა და საზოგადოებრივ აზრზე გავლენის შესაძლებლობას, შეერთებული შტატების კონგრესმა 2024 წლის აპრილში კანონი მიიღო და ByteDance-ს მოსთხოვა, პლატფორმა ამერიკულ კომპანიას მიჰყიდოს.
ჩინურმა კომპანიამ, რომელმაც კანონი მომხმარებელთა გამოხატვის თავისუფლების შეზღუდვად შეაფასა, TikTok-ის გაყიდვაზე უარი თქვა. აშშ-ში ამ სოციალური ქსელის ამკრძალავი კანონი 2025 წლის 19 იანვარს ამოქმედდა და TikTok-ი გაითიშა.
19 იანვარს დონალდ ტრამპმა თავის სოციალურ ქსელ Truth Social-ში დაწერა, რომ ინაუგურაციის შემდეგ გამოსცემს TikTok-ის აკრძალვის სამი თვით გადავადების ბრძანებას.
ინაუგურაცია დღეს, 20 იანვარს, გაიმართება.
ინაუგურაციამდე ერთი დღით ადრე ვაშინგტონში, კომპლექს Capital One Arena-ზე მხარდამჭერების წინაშე გამოსვლისას ტრამპმა განაცხადა, რომ TikTok-ი დაბრუნდა და ის უნდა შეინარჩუნონ. დონალდ ტრამპის თქმით, ეს სოციალური ქსელი მოსწონს, რადგან რესპუბლიკელებს დაეხმარა არჩევნებში ახალგაზრდების მხარდაჭერის მოპოვებაში.