უკრაინის საჰაერო ძალების ცნობით, რუსეთმა მორიგი შეტევისთვის 104 დრონი გამოიყენა
დნეპროპეტროვსკის საოლქო-სამხედრო ადმინისტრაციის მიერ დილით გამოქვეყნებული მონაცემებით, ქალაქ დნეპრში დაზიანებულია სამი მრავალსართულიანი სახლი, ხოლო სამარსკის რაიონში - სამი კერძო სახლი.
ადმინისტრაციის ცნობითვე, საოკუპაციო ძალებმა ნიკოპოლის რაიონს სარაკეტო-სისტემა „გრადით“ დაარტყეს, რასაც ნგრევა მოჰყვა ერთ-ერთი საწარმოს ტერიტორიაზე. ადგილობრივი ხელისუფლება კონკრეტულ საწარმოს არ ასახელებს. დნეპროპეტროვსკის საოლქო-სამხედრო ადმინისტრაციის ინფორმაციით, მსხვერპლი არ არის.
რუსული დრონებით შეტევის შედეგად კრიტიკული ინფრასტრუქტურის ობიექტების დაზიანების შესახებ იუწყება ივანო-ფრანკოვსკის საოლქო-სამხედრო ადმინისტრაცია. კონკრეტულ ობიექტებს არც ის ასახელებს. წინასწარი მონაცემებით მსხვერპლი არ არის.
უკრაინის საჰაერო ძალების სარდლობის მიერ 27 იანვარს, დილით გამოქვეყნებული მონაცემებით, ღამის განმავლობაში მოწინააღმდეგემ გამოიყენა 104 უპილოტო საფრენი აპარატი, რომელთაგან 57 ჩამოაგდეს, 39 კი „ლოკალურად დაიკარგა ნეგატიური შედეგების გარეშე".
საჰაერო ძალების ცნობით, რუსული დრონებით შეტევის შედეგად ინფრასტრუქტურის ობიექტები და სახლები დაზიანდა დნეპროპეტროვსკის, ივანო-ფრანკოვსკის, სუმის და კიევის ოლქებში.