პესკოვის თქმით, რუსეთსა და უკრაინას შორის ტერიტორიების გაცვლა შეუძლებელია
რუსეთსა და უკრაინას შორის ტერიტორიების გაცვლა შეუძლებელია, განაცხადა რუსეთის პრეზიდენტის პრესმდივანმა დმიტრი პესკოვმა.
მისი თქმით, რუსეთს არასოდეს განუხილავს და არ განიხილავს თავისი ტერიტორიის გაცვლის საკითხს. „რა თქმა უნდა, ამ ტერიტორიიდან უკრაინული შენაერთები განიდევნებიან. ვინც არ განადგურდება, ყველა განიდევნება“, განაცხადა პესკოვმა.
გუშინ უკრაინის პრეზიდენტმა ვოლოდიმირ ზელენსკიმ განაცხადა, რომ მოლაპარაკებების შემთხვევაში შესაძლოა მოსკოვს შესთავაზონ კურსკის რეგიონში უკრაინის შეიარაღებული ძალების მიერ კონტროლირებადი ტერიტორიების გაცვლა უკრაინის იმ ტერიტორიებზე, რომლებსაც რუსეთის არმია აკონტროლებს. მან აღნიშნა, რომ ჯერ არ იცის, რუსეთის მიერ ოკუპირებული ტერიტორიის რა ნაწილს ითხოვს კიევი კურსკის ოლქის ნაწილის სანაცვლოდ.
ზელენსკიმ ასევე თქვა, რომ მზად არის რუსეთთან მოლაპარაკებისთვის, მაგრამ სურს, რომ მისმა ქვეყანამ ძალის პოზიციიდან იმოქმედოს.