გერმანიის კანცლერი უარყოფს უცხოთა ჩარევას „ჩვენს დემოკრატიაში“
შოლცმა ეს განაცხადა მიუნხენის უსაფრთხოების კონფერენციაზე მას მერე, რაც ერთი დღის წინ აშშ-ს ვიცე-პრეზიდენტმა, ჯეი დი ვენსმა სიტყვით გამოსვლისას მიმართა ევროპას, გაეღო კარი ულტრამემარჯვენე პარტიებისთვის.
AFP-ის ცნობით, შოლცმა, გერმანიაში არჩევნებამდე რვა დღით ადრე, ილაპარაკა მიუნხენში, სადაც ვენსი 14 თებერვალს გამოვიდა გერმანიისა და ევროკავშირის მიმართ კრიტიკული სიტყვით, რომელიც მოგვიანებით შეაქო აშშ-ს პრეზიდენტმა, დონალდ ტრამპმა.
ვენსი ასევე შეხვდა ალის ვაიდელს, ულტრამემარჯვენე პარტიის, ალტერნატივა გერმანიისთვის (AfD) მთავარ კანდიდატს, რომელსაც ძლიერი მხარდაჭერა აქვს მილიარდერ და ტრამპის მოკავშირე, ილონ მასკისგან.
მიუნხენის უსაფრთხოების კონფერენციაზე სიტყვით გამოსვლისას, შოლცმა დაიცვა გერმანიაში ექსტრემისტულ პარტიებთან თანამშრომლობის “აკრძალვა”, რომელსაც ხშირად „ბრანდმაუერს“- ხანძრისგან დამცავ კედელს” უწოდებენ.
”ჩვენთვის მიუღებელია უცხო პირების ჩარევას ჩვენს დემოკრატიაში, ჩვენს არჩევნებში”, - განაცხადა შოლცმა. "ეს არ არის მიზანშეწონილი - განსაკუთრებით, მეგობრებსა და მოკავშირეებს შორის."
ვენსის გამოსვლის შემდეგ, ევროპული პოლიტიკა დაიცვა საფრანგეთის საგარეო საქმეთა მინისტრმა, ჟან-ნოელ ბარომაც. გამოხატვის თავისუფლება გარანტირებულია ევროპაში", - თქვა ბარომ X-ზე მას შემდეგ, რაც ვენსმა განაცხადა, რომ ის "უკან იხევს".
„არავინ არის ვალდებული მიიღოს ჩვენი მოდელი, მაგრამ არავის შეუძლია თავისი [მოდელი] მოგვახვიოს თავს“, - დასძინა ფრანგმა მინისტრმა.
შოლცმა თავისი გამოსვლა დაიწყო იმით, რომ ახსენა ვენსის ადრინდელი ვიზიტი ნაცისტების მმართველობის პერიოდის დახაუს საკონცენტრაციო ბანაკში, მიუნხენის მახლობლად, და აშშ-ს ვიცე-პრეზიდენტის ვალდებულება, რომ „აღარასდროს“ დაუშვას მსგავსი დანაშაულების ჩადენა.
ჰოლოკოსტი იყო მიზეზი იმისა, რომ „გერმანელების დიდი უმრავლესობა მტკიცედ ეწინააღმდეგება მათ, ვინც ადიდებს ან ამართლებს“ ნაცისტებს, თქვა შოლცმა და გაიხსენა, როგორ ცდილობენ AfD-ის მაღალი რანგის წარმომადგენლები ნაციზმის პერიოდის დანაშაულები რბილად წარმოაჩინონ.
"აღარასოდეს" - ამ იდეის ერთგულება შეურიგებელია AfD-ს მხარდაჭერასთან", - განაცხადა შოლცმა. „ჩვენთვის სრულიად ცხადია, რომ უკიდურესი მემარჯვენეები პოლიტიკური გადაწყვეტილების მიღების პროცესის მიღმა უნდა დარჩნენ და მათთან არანაირი თანამშრომლობა არ იქნება,“ - განაცხადა გერმანიის კანცლერმა.
აშშ-ის ვიცეპრეზიდენტმა გააკრიტიკა გერმანია იმ პარტიების გარიყვის მცდელობის გამო, რომლებიც გამოხატავენ ძლიერ შეშფოთებას იმიგრაციასთან დაკავშირებით და თქვა, რომ „დემოკრატია ეფუძნება წმინდა პრინციპს, რომ ხალხის ხმას აქვს მნიშვნელობა“.
ტრადიციულ მოკავშირეებს შორის დაპირისპირება გერმანიის საყოველთაო არჩევნებამდე სულ რაღაც ერთი კვირით ადრე ხდება.
AFP-ის მონაცემებით, შოლცის მემარცხენე-ცენტრისტული სოციალ-დემოკრატები ამჟამად მესამე ადგილზე არიან გამოკითხვებში, დაახლოებით 15 პროცენტით. წინასაარჩევნო რბოლას ლიდერობს კონსერვატიული ქრისტიან-დემოკრატიული და ქრისტიან სოციალისტური პარტიების ბლოკი, რომელსაც დაახლოებით 30 პროცენტი ემხრობა.
მოსალოდნელია, რომ AfD-ი მოიპოვებს თავის საუკეთესო შედეგს ისტორიაში, ახლა ის მეორე ადგილზეა დაახლოებით 20 პროცენტით.