თეთრი სახლი: ირანთან პრობლემის მოგვარება შეიძლება სამხედრო გზით ან მოლაპარაკებებით
„ვიმედოვნებთ, რომ ირანის რეჟიმი თავის ხალხს და ინტერესებს ტერორზე მაღლა დააყენებს“, თქვა თეთრი სახლის ეროვნული უშიშროების საბჭოს სპიკერმა ბრაიან ჰიუზმა მას შემდეგ, რაც ირანის უზენაესმა ლიდერმა აიათოლა ალი ხამენეიმ განაცხადა, რომ თეირანი მოლაპარაკებას არ აპირებს.
აშშ-ის პრეზიდენტმა დონალდ ტრამპმა თეირანთან შეთანხმებისადმი ღიაობა გამოხატა და ამავე დროს განაახლა მაქსიმალური ზეწოლის კამპანია, რომელიც მისი პრეზიდენტობის პირველი ვადის დროს გამოიყენებოდა გლობალური ეკონომიკისგან ირანის იზოლირებისთვის და მისი ნავთობის ექსპორტის ნულამდე შემცირებისთვის.
პირველი ვადის განმავლობაში ტრამპმა შეერთებული შტატები გამოიყვანა ირანსა და მსხვილ სახელმწიფოებს შორის შეთანხმებიდან, რომელიც ბირთვულ სფეროში ირანის აქტიურობაზე მკაცრ შეზღუდვებს აწესებდა სანქციების შემსუბუქების სანაცვლოდ.
ატომური ენერგეტიკის საერთაშორისო სააგენტოს, IAEA-ის გენერალურმა დირექტორმა რაფაელ გროსიმ განაცხადა, რომ დიპლომატიას ცოტა დრო რჩება ირანის საქმიანობაზე ახალი შეზღუდვების დაწესებისთვის, რადგან თეირანი აგრძელებს ურანის გამდიდრების დაჩქარებას იმ დონემდე, რომელიც ახლოს არის ბირთვული იარაღისთვის საჭირო მოთხოვნებთან.
თეირანი ასევე ავითარებს პროგრამას ბალისტიკური რაკეტების წარმოებისა და განლაგებისთვის და აცხადებს, რომ ის წმინდა თავდაცვითი ხასიათისაა. დასავლეთში ამ პროგრამას ახლო აღმოსავლეთში დესტაბილიზაციის ფაქტორად განიხილავენ.