ხარკოვზე ისევ დრონებით შეტევა იყო
რუსეთის ჯარებმა უპილოტო საფრენი აპარატებით მორიგი იერიში მიიტანეს უკრაინის ქალაქ ხარკოვზე.
ქალაქის მერის, იჰორ ტერეხოვის ინფორმაციით, ღამის განმავლობაში ხარკოვის კიევის რაიონში ექვსი აფეთქება იყო, რამაც ხანძრები გამოიწვია.
მერის თანახმად, დარტყმის ერთ-ერთი სამიზნე იყო სამოქალაქო საწარმო. დაზიანებულია ახლომდებარე სახლები, საბავშვო ბაღის შენობა და სპორტული კომპლექსი. დაშავდა ორი ადამიანი.
ხარკოვში 31 მარტს, შუაღამის შემდეგ გამოცხადდა საჰაერო განგაში, რომლის დროსაც მოქალაქეები ვალდებული არიან, თავი უსაფრთხო ადგილებს შეაფარონ.
რუსეთის ჯარები ხარკოვს თითქმის ყოველდღე უტევენ. 29 მარტს დრონებით თავდასხმის შედეგად დაიღუპა 2 მშვიდობიანი მოქალაქე და 50-ზე მეტი დაშავდა.
განახლება: უკრაინის საჰაერო ძალების სარდლობის მიერ დღეს, 31 მარტს გამოქვეყნებული ინფორმაციით, რომელიც სხვა წყაროებით გადამოწმებული არ არის, გასული საღამოდან დღეს დილამდე რუსეთმა გამოიყენა ორი ბალისტიკური რაკეტა „ისკანდერი“ და სხვადასხვა ტიპის 131 დრონი.
სარდლობის თანახმად, საჰაერო და თავდაცვის ძალების ქვედანაყოფებმა 57 ე.წ. დამრტყმელი უპილოტო საფრენი აპარატი ჩამოაგდეს უკრაინის ჩრდილოეთ, აღმოსავლეთ და ცენტრალურ რეგიონებში, ხოლო 45 „უპილოტო-იმიტატორი ლოკალურად დაიკარგა ნეგატიური შედეგების გარეშე“.
უკრაინის საჰაერო ძალების სარდლობის ცნობით, დაზარალდნენ ხარკოვის, სუმის, დონეცკის, კიევის და ჟიტომირის ოლქები
უკრაინული დრონებით შეტევის შესახებ იუწყება რუსეთიც. თავდაცვის სამინისტროს მიერ დღეს, 31 მარტს გამოქვეყნებული ინფორმაციით, რომელიც სხვა წყაროებით გადამოწმებული არ არის, ღამის განმავლობაში გაანადგურეს 66 უპილოტო საფრენი აპარატი. მათ შორის 41 - ბრიანსკის ოლქში, 24 - კალუგაში და 1 - კურსკის ოლქში.
რუსეთის თავდაცვის სამინისტრო ხმელეთზე შედეგების შესახებ არაფერს ამბობს.