ტრამპი: თუ ზელენსკი სასარგებლო წიაღისეულზე შეთანხმებიდან გამოვა, „დიდი პრობლემები“ ექნება
აშშ-ის პრეზიდენტი დონალდ ტრამპი აცხადებს, რომ უკრაინის პრეზიდენტ ვოლოდიმირ ზელენსკის სასარგებლო წიაღისეულზე შეთანხმების პირობების გადახედვა სურს და გარიგებიდან გასვლას ცდილობს.
ტრამპის თქმით, თუ ზელენსკი ამას გააკეთებს, „დიდი პრობლემები“ ექნება. დონალდ ტრამპმა ეს 30 მარტს ჟურნალისტებს უთხრა პრეზიდენტის თვითმფრინავში, რომლითაც უქმე დღეების შემდეგ ფლორიდის რეზიდენციიდან ვაშინგტონში დაბრუნდა.
ტრამპის განცხადებითვე, ზელენსკის ნატოს წევრობა სურს, მაგრამ ვერასდროს გახდება და ეს ესმის.
გასულ კვირაში დასავლეთის და უკრაინის მედიასაშუალებები წერდნენ, რომ ამერიკის შეერთებულმა შტატებმა უკრაინას წარუდგინა შეთანხმების განახლებული პროექტი, რომელიც ითვალისწინებს უკრაინის ბუნებრივ რესურსებზე სრულ კონტროლს უსაფრთხოების გარანტიების გარეშე.
30 მარტს Bloomberg-ი წერდა, რომ უკრაინა აშშ-ს შესთავაზებს ახალ პროექტში ცვლილებებს, მათ შორის ამერიკული ინვესტიციების გაზრდის პირობას.
პრეზიდენტმა ტრამპმა პირველად 2025 წლის თებერვლის დასაწყისში განაცხადა, რომ სურს, უკრაინის დახმარების სანაცვლოდ მისგან მიიღოს იშვიათ მიწათა ელემენტები.
რუსეთთან ომში მყოფი უკრაინა თავისი ბუნებრივი რესურსების სანაცვლოდ უსაფრთხოების მყარ გარანტიებს მოითხოვდა.
უკრაინას და აშშ-ს 28 თებერვალს, ვაშინგტონში პრეზიდენტ ზელენსკის ვიზიტისას, უნდა მოეწერათ ხელი ეკონომიკური თანამშრომლობის, მათ შორის სასარგებლო წიაღისეულის შესახებ შეთანხმებისთვის.
თეთრ სახლში მოლაპარაკების დაწყების წინ, პრესისთვის საჯარო შეხვედრისას, სიტყვიერი დაპირისპირება მოხდა, ერთი მხრივ, პრეზიდენტ ზელენსკის და, მეორე მხრივ, პრეზიდენტ ტრამპს და ვიცე-პრეზიდენტ ვენსს შორის. ამ კონფლიქტის შემდეგ უკრაინის პრეზიდენტმა თეთრი სახლი დატოვა.