„მადლობას ვუხდით ვატიკანს მზადყოფნისთვის, გახდეს პლატფორმა უკრაინასა და რუსეთს შორის მოლაპარაკებებისთვის“ - ზელენსკი რომის პაპს შეხვდა
უკრაინის პრეზიდენტი, ვოლოდიმირ ზელენსკი პირველ ლედისთან ოლენა ზელენსკასტან ერთად რომის პაპს ლეო XIV-ს შეხვდა.
ამის შესახებ ზელენსკი სოციალურ ქსელში წერს და მადლობას უხდის რომის პაპს:
„მილიონობით ადამიანისთვის მთელ მსოფლიოში პონტიფიკოსი მშვიდობის იმედის სიმბოლოა. წმინდა საყდრის ავტორიტეტსა და ხმას შეუძლია მნიშვნელოვანი როლი ითამაშოს ამ ომის დასრულებაში.
ჩვენ მადლობას ვუხდით ვატიკანს მზადყოფნისთვის, გახდეს პლატფორმა უკრაინასა და რუსეთს შორის პირდაპირი მოლაპარაკებებისთვის. ჩვენ მზად ვართ დიალოგისთვის ნებისმიერ ფორმატში ხელშესახები შედეგებისთვის. ჩვენ ვაფასებთ უკრაინის მხარდაჭერას და მკაფიო ხმას სამართლიანი და ხანგრძლივი მშვიდობის დასაცავად“, - წერს ზელენსკი.
რომის პაპმა ლეო XIV-მ განაცხადა, რომ რუსეთსა და უკრაინას შორის მოლაპარაკებების ერთ-ერთი წერტილი სწორედ ვატიკანი შეიძლება იყოს.
აშშ-ის სახელმწიფო მდივანი, მარკო რუბიო, არ გამორიცხავს, რომ შესაძლოა მიიღონ ვატიკანის შეთავაზება, უზრუნველყოს უკრაინისა და რუსეთის ლიდერების შეხვედრა.
„ვატიკანმა შემოგვთავაზა ძალიან გულუხვი წინადადება, მათ შორის, ორგანიზება გაუკეთოს არა მხოლოდ ზელენსკისა და პუტინის შეხვედრას. ეს არის ის წინადადება, რომელიც შესაძლოა მიღებულ იქნას. მხედველობაში მაქვს ის, რომ ეს არის ადგილი, სადაც კომფორტულად შეიძლება იგრძნოს თავი ყველა მხარემ. ასე რომ, ვიმედოვნებ, მივალთ იმ სტადიამდე, როდესაც მოლაპარაკებები გაიმართება რეგულარულად და ვატიკანი მიიღებს შესაძლებლობას, იყოს მოლაპარაკებების ადგილის ერთ-ერთი ვარიანტი“, - განაცხადა რუბიომ CBS News-თან ინტერვიუში.
18 მაისს, რომის პაპის ინაუგურაციის შემდეგ, ვოლოდიმირ ზელენსკი აშშ-ის სახელმწიფო მდივანსა და აშშ-ის ვიცე-პრეზიდენტს ჯეი დი ვენსის შეხვდა.
მედიის ინფორმაციით, შეხვედრა დაახლოებით 40 წუთს გაგრძელდა.