Айар — үрүҥ түүннэрэ
Саха омук олоҕун-дьаһаҕын, үлэтин-хамнаһын төрүтэ буолар аҕыс ыйдаах кырыалаах кыстыкпыт түмүктэнэр уһугун чарапчыланан аастыбыт. Саха урукку олоҕор кыстыкка бэлэмнэнии уонна кыстыгы туораан күөххэ үктэнии уһулуччу суолталаах уратыта күн бүгүн даҕаны уларыйбат. Кыһыммыт уонна тымныыбыт баалларын тухары өрүүтүн оннук буола туруоҕа.
Дьыл кэмин хаамыытыгар сөп түбэһиннэрэн, сайын саҕаланыытын, күөххэ үктэниини киэҥ далааһыннаахтык бэлиэтиибит.
Алаһа дьиэҕэ хас биирдии ыал саламааты, арыылаах алаадьыны уонна кус миинин буһарар. Сыт таһааран, буруолатан, дьиэлэрин ыраастыыллар. Бу кэмҥэ киһи эрэ үөрүөх-көтүөх курдук. Айылҕа уһуктан, от-мас көҕөрөр, көтөр-сүүрэр кэлэр, олох өрөгөйүн уруйдаан, ырыа-тойук эгэлгэтин тардар… Онон киһи сүргэтэ эмиэ көтөҕүллэр, айылҕалыын ситимэ биллэ күүһүрэр.
Бу кэмҥэ айылҕаҕа үгүстүк сылдьан, алгыстанан-ыраастанан кыстыкка киирэргэ күүс-уох, сэниэ ылынаҕын. Чөл туруктаах, бигэ тирэхтээх, дохсун санаалаах буолаҕын.
Маннык сырдык кэмҥэ, сир-дойду чээлэй күөҕүнэн силигилээн, ситэн-тупсан эрдэҕинэ «Айар» кинигэ кыһата, сылын ахсын үтүө үгэскэ кубулутан «Айар — үрүҥ түүннэрэ» атыы-эргиэн дьаарбаҥкатын тэрийэн ыытар. Быйылгы тэрээһин, сахалыы ураты тыыннаах, алгыстаах, ыраастанар-арчыланар сиэрдээх-туомнаах буолуоҕа.
«Айар» социальнай ситимнэригэр суруттарыҥ: telegram — https://t.me/ayarbook , VK — https://vk.com/ayar2022 . Сотору кэминэн «Айар – үрүҥ түүннэрэ» тэрээһин тосхоло тахсыаҕа.