Литэрэтиирэни таптааччылар кулууптарын сүрэхтэниитэ буолла
«БукБариста» литэрэтиирэни таптааччылар кулууптарын сүрэхтэниитэ буолла
Бу дьыл олунньу ый 28 күнүгэр С.Н. Донской-II аатынан Үөрэҕи сайыннарар уонна идэни үрдэтэр үнүстүүтэ Улуу Кыайыы 80 сылыгар уонна саха суругунан литэрэтиирэтэ төрүттэммитэ 125 сылыгар аналлаах Валентина Иннокентьевна Комиссарова – Күлүмүрэ, терапевт, спорт бырааһа, көҥүл хоһоонньут, тылбаасчыт, айар олоҕор анаммыт «Дьүөрэл иэйии киэһэтэ» литэрэтиирэ кулуубун тэрийэн ыытта. Тэрээһин «БукБариста» литэрэтиирэ кулуубун сүрэхтэниититтэн саҕаланна. Тэрээһиҥҥэ Кулууп салайааччылара, үнүстүүт дириэктэрин I-кы солбуйааччыта, филол.наука билимин кандидаата Николай Бугаев, филология кафедратын салайааччыта Любовь Андросова, алын кылаас уонна инклюзивнай үөрэхтээһин кафедратын салайааччыта Людмила Прокопьева тыл эттилэр, кулуубу үөрүүлээх быһыыга-майгыга арыйдылар.
Литэрэтиирэ кулуубун иккис чааһын филология кафедратын аҕа учуутала Светлана Липатова ыытта. Манна Дьокуускай куорат 12 нүөмэрдээх, Саха политехничэскэй лицейин уонна “Айыы Кыһата” оскуолаларын үөрэнээччилэрэ, учууталлара уонна М.К. Аммосов аатынан Хотугулуу-Илиҥҥи бэдэрээлинэй үнүбэрситиэт саха тылын салаатын устудьуоннара кыттыыны ыллылар. Саха Өрөспүүбүлүкэтин үтүөлээх артыыһа Владимир Заболоцкай Валентина Комиссарова хоһоонугар “Сайын кэллэ” диэн ырыаны бэлэх уунна. «Ийэ дойдуга таптал» диэн бастакы түһүмэххэ: суруйааччы айар олоҕун кытта билистибит. Валентина Иннокентьевна Комиссарова – Күлүмүрэ дьүөрэл-ырыа буолбут хоһооннорун иһиттибит. Нуучча суруйааччыта Иван Суриков “Детство” диэн хоһоонун суруйааччы сахалыы тылынан тылбаастаабытын 12-с оскуола үөрэнээччилэрин “Эр хоһуун” бөлөх толордо. Салайааччы — Клара Ксенофонтова.
Онтон оҕо барыта сөбүлээн ааҕар, үөрэтэр нуучча улуу поэтын А.Пушкин хоһооннорун тылбааһын Саха политехническэй лицей үөрэнээччилэрэ ааҕан иһитиннэрдилэр. Салайааччы — Ульяна Заболоцкая. Салҕыы кулууппут «Аҕа дойду сэриитэ» диэн иккис түһүмэҕэр тылбаасчыт ырыа буолбут хоһооннорун иһиттибит. Саха Өрөспүүбүлүкэтин үтүөлээх артыыһа Саина Расул Гамзатов тылларыгар, Ян Френкель муусукатыгар, Күлүмүрэ тылбааһыгар “Кыталык үөрэ” («Журавли») диэн ырыаны Улуу Кыайыы күнүгэр сахалыы тылынан толорбутун көрөн оҕолор сэҥээрдилэр. Салҕыы “Айыы кыһата” гимназия 10в кылааһын уолаттара Константин Симонов тылларыгар, Валентина Комиссарова — Күлүмүрэ тылбааһыгар «Күүт миигин» (“Жди меня”) хоһоонун икки тылынан аахтылар уонна Алексей Сурков тылларыгар, Константин Листов муусукатыгар, Күлүмүрэ тылбааһыгар “Холомоҕо” (“В землянке”) диэн ырыаны сахалыы ыллаатылар. Дьүөрэл киэһэтин Саха норуодунай артыыһа Александр Емельянов «Экипажу танка Алеша» диэн ырыаны ыллаан эбии киэргэттэ, патриотическай тыынын күүһүрдэн биэрдэ.
Тэрээһиммит түмүгэр оҕолор бэйэлэрин санааларын үллэһиннилэр, Валентина Иннокентьевнаҕа ыйытыылары биэрдилэр, сэһэргэстилэр уонна тэрээһин саҕаланыаҕыттан уруһуйдаабыт уруһуйдарын бэлэхтээтилэр. Дьоро киэһэбитин Саха Өрөспүүбүлүкэтин филармониятын артыыһа Леонид Анциферов “Госпожа Туймаада” диэн кэрэ ырыатынан түмүктээтэ. Төрөөбүт дойдуга таптал, бэриниилээх буолуу, ыччаты бэрт кыра сааһыттан патриотическай тыыҥҥа иитии билиҥҥи олоххо сүрүн ирдэбилбит буолар. Оҕолор бэлэмнээн кэлбит хоһооннорун ааҕан суруйааччы биһирэбилин ыллылар. Валентина Иннокентьевна Комиссарова-Күлүмүрэ айар үлэтигэр үрдүк ситиһиилэри баҕарабыт, кини айбыт, тылбаастаабыт хоһоонноро куруук бу курдук кэлэр кэнчээри ыччаты сырдыкка, кэрэҕэ угуйа, уһуйа турдуннар.
Светлана Липатова, филология кафедратын аҕа учуутала
Сообщение Литэрэтиирэни таптааччылар кулууптарын сүрэхтэниитэ буолла появились сначала на SAKHALIFE.