Новости за 01.06.2024

Җәйнең беренче көнендә Татарстанда һава температурасы +25..+30 градус тәшкил итәчәк. Бу хакта республика Гидрометеорология һәм әйләнә-тирә мохитне күзәтү идарәсе хәбәрендә әйтелә.

Шушы көннәрдә Татарстанның Аксубай районы администрациясендә узган ведомствоара комиссия утырышында үз эшен ачу өчен социаль контракт төзергә теләгән үзмәшгуль кешеләрнең бизнес-планнары тикшерелде.

Кукмарада «Галактика» балалар иҗат үзәгендә районда туризмны үстерүгә багышланган киңәшмә узды. Очрашуны район башлыгы Сергей Димитриев үткәрде. Бу хакта «Хезмәт даны» сайтында Эльвира Миннәхмәтова яза.

Актаныш авылы «Җәмигъ» мәчетендә «Мин намаз укырга яратам» бәйгесе уздырылды. Аны Актаныш мөхтәсибәте оештырды. Бу хакта «Актаныш» сайтында хәбәр ителә.

Азнакай шәһәр һәм район укучылары сәнәгать паркы эшчәнлеге белән таныштылар. Укучылар белән очрашуда район башлыгы Марсель Шәйдуллин, район башкарма комитеты җитәкчесе Айдар Шәмсетдинов, район эшмәкәрләр берлеге җитәкчесе Әнвәр Җиһангиров, шәхси эшмәкәр Зиннур Гыйльфанов катнашты. Бу хакта «Азнакай» сайтында Нәсимә Фазлыева яза.

Лениногорск районы Шөгер авылында, якынлашып килүче Сабантуй бәйрәменә багышланган сөлге җыю йоласы узды. Бу хакта «Зуман сулышы» Шөгер авылы мәдәният учагының ВКонтакте социаль челтәрендәге сәхифәсенә сылтама белән хәбәр итә.

Нурлатта Әхмәдзәки хәзрәт Сафиуллин исемендәге тәгълим үзәгендә «Әдәп-әхлак тәрбиясе бирү - безнең уртак бурычыбыз» дип аталган конференция узды. Бу хакта «Нурлат-информ» сайтында Айгөл Сергеева яза.