Новости за 06.11.2024

Республика партиясеннән Америка Кушма Штатлары президентлыгына кандидат Дональд Трамп сайлаучыларның 277 тавышын алган. Аның оппоненты – гамәлдәге вице-президент, Демократик партиядән дәгъвачы Камала Харрис 226 тавыш җыйган. Бу хакта республикачыларга теләктәшлек күрсәтүче Fox News телеканалы хәбәр итә.

ТР Дәүләт Советы Рәисе Фәрит Мөхәммәтшин барлык татарстанлыларны Татарстан Конституциясе көне белән котлады. Ул моннан 32 ел элек, 1992 елның 6 ноябрендә, Югары Советның республиканың Төп законын кабул итү өчен бертавыштан диярлек тавыш бирүен искәртте.

ТР Рәисе Рөстәм Миңнеханов Telegram-каналында һәм «ВКонтакте» социаль челтәрендәге сәхифәсендә Татарстан Республикасы Конституциясе көне уңаеннан видеокотлау урнаштырды.

Габдулла Тукай исемендәге Татар дәүләт филармониясе Россия һәм Татарстанның халык артисты Илһам Шакировның туган ягы – Тукай районы Яңа Бүләк авылында «Гасырларны кичкән татар моңы» дип исемләнгән зур концерт оештырды. Концертта Татар дәүләт филармониясе артистлары, Илһам Шакиров исемендәге «Татар моңы» фестивале һәм Республика премиясе лауреатлары чыгыш ясады.

Татарстанда чәршәмбе, 6 ноябрьдә (ТР Конституциясе көне), көндез урыны белән бераз кар явачак.

Татарстан Рәисе Рөстәм Миңнеханов Татарстан Конституциясе көне уңаеннан республика халкына мөрәҗәгать итте.

8 һәм 9 ноябрьдә Питрәч районында супермаркетларда «Игелек кәрзине» хәйрия акциясе узачак. Бу хакта «Алга» газетасы яза.

Иҗтимагый киңлекләрне төзекләндерү буенча проект кысаларында Арча районыны Яңа Кенәр авылында «Җиһангирлар паркы» сафка басты. Узган атнада әлеге паркны ачу тантанасы булды. Бәйрәм Яңа Кенәр урта мәктәбендә башланып китте. Бу хакта «Арча хәбәрләре» газетасы яза.

Мөслим районы Мәлләтамак авылында «Сөләйман» мәчетенең 20 еллыгын уздырдылар. Чара Коръән аятьләре уку белән башланып китте, дип яза «Авыл офыклары» газетасы.

4 ноябрьдә Мәскәүнең Горбунов исемендәге мәдәният сараенда International dance festival (халыкара хореография фестивале) «KONKURENT» чарасы узды. Бәйгедә «Әлмәтем» халык бию ансамбле җиңү яулады. Бу хакта «Әлмәт таңнары» газетасы яза.