Аксубайда Уяв чуваш мәдәнияте бәйрәмен билгеләп үттеләр
Аксубайда Уяв чуваш мәдәнияте бәйрәме узды. Чуваш милләтенең һәр вәкиле өчен бу халык тарихына барып тоташкан үзенчәлекле вакыйга. Ул кабатланмас колорит һәм тирән шигъри эчтәлеккә ия. Мәйдан буйлап чуаш көйләре таралды, катнашучыларны төбәк тарихына чумды. Бу хакта «Авыл таңнары» сайтында хәбәр ителә.
Бер сюжет икенчесе белән алмашынды. Авыл мәдәният йортларының үзешчән артистлары, балалар коллективлары, балалар сәнгать мәктәбе тәрбияләнүчеләре болында уйнап, милли бәйрәмнең яңгыр теләү элементларын күрсәтте.
Чабаксардан килгән җыр һәм бию ансамбле дә милли биюләр белән сөендерде. Йөзләгән катнашучы матур тамашаны сокланып карады. Һәм, ниһаять, чуваш нәселенең өлкән кешеләре, борынгы традицияләрне саклаучылар җиргә чөй кактылар. Бу гамәл яхшы, игелекле эшнең башлануын аңлата.
Бәйрәмнең рәсми өлешен район башлыгы Камил Гыйльманов ачты.
«Аксубай районында күп гасырлар руслар, чувашлар һәм татарлар бердәм тугандаш гаилә белән дуслыкта һәм татулыкта яши. Безнең республика, район үсешендә күпсанлы уңышларга, милләтенә һәм диненә карамастан, барлык район халкының фидакарь хезмәте ярдәмендә ирешелде. Һәрбер халык үз тамырлары белән нык һәм көчле. Мин ата-бабаларның борынгы йолаларын, тарихын һәм мәдәниятен саклаган һәм хөрмәт иткән якташларыма рәхмәтлемен», – диде ул.
«Бәйрәм белән кадерле дуслар! Уяв – борынгы халык бәйрәме. Традицияләрне хөрмәт иткәнегез, аларны киләчәк буыннар өчен саклаганыгыз өчен сезгә чын күңелдән рәхмәт белдерәсем килә», – Татарстан Халыклары ассамблеясе советы башкарма комитеты җитәкчесе Геннадий Яковлев.
Район халкын чын күңелдән Уяв бәйрәме белән Чувашия хатын-кызлары берлеге рәисе Сильвия Чайкина, «Сувар» республика чуваш газетасы баш мөхәррире Ирина Трифонова котлады.