Татарстанда Әфганстанда һәлак булучылар хөрмәтенә истәлек такталары куйдылар
Татарстанда өч йортка Әфганстанда һәлак булган яшь егетләрнең фотолары белән истәлек такталары урнаштырдылар. Хәрби хезмәткәрләрнең туган йортларына урнаштырылган такталарда хәрбиләрнең фотолары куелган, туган еллары һәм һәлак булу сәбәпләре язылган. Истәлек такталарын куюны районның Хәрби хәрәкәтләре ветераннары советы оештырган.
Беренче истәлек тактасын Буа районы Черки Кильдуразы авылында Шәрәфетдин Баһаветдинов яшәгән йортка урнаштырдылар. Егет 1981 елның 9 сентябрендә Әфганстанда хәрби бурычын үтәгәндә һәлак була. Ул үлгәннән соң Кызыл Йолдыз ордены белән бүләкләнә. Аның әнисе Хәҗия Баһаветдинова бүген дә улы турында күз яшьләрсез сөйли алмый.
«Бу хатирәләрне яңарту, кабат ни булганын искә төшерәсең», - диде хәрбинең әнисе.
Буа районы Кыр Әнәле авылында Рәсим Мәүлетов фотосы белән истәлекле такта куйдылар. Егет балачактан хезмәт сөючән булган. Армиягә китәр алдыннан бер машина каен утыны ярган. Хәрби хезмәтен тәмамлагач туган йортын кирпеч белән тышларга хыялланган.
«Бик хезмәт сөючән, кешелекле, кешеләр белән һәрвакыт яхшы аралашты һәм ярдәм итте, аның киң күңелле булуына сокланалар иде», - дип сөйләде әнисе Әлфия Мәүлетова.
Тагын бер геройның берсе Фәрит Әхмәтов Буа районы Аксу авылында туган. Армиядән «минем белән барысы да яхшы, әни, үзеңне сакла» дип хатлар язган. Әфганчының әнисе вафат булган инде. Аның турындагы хатирәләр белән туганы уртаклашты. Хәрбинең апасы Резедә Әхмәтова сөйләвенчә, аның герой абыйсы кечкенәдән сабыр һәм киң күңелле була, мәктәптә яхшы укый, кешеләргә гел ярдәм итәргә тырыша.
Фәрит армиягә кадәр автомобиль йөротүченең ярдәмчесе булып эшли. Әдәбият белән мавыга, кайвакытта яшеренеп укыган.
Фәрит Әхмәтовның абыйсының хатыны Мәрьям хатирәләре белән уртаклаша, өлкән абыйсы аңа дәресләр белән күбрәк шөгыльләнергә кушкан, ә ул матур әдәбият укырга яраткан.
«Һәлак булган егетләр истәлегенә алар яшәгән йортлар фасадына мәрмәр такталар урнаштырырга булдык, алга таба да бу эшне дәвам итәргә планлаштырабыз», - дип сөйләде Әфганстан сугышы ветераны Фәнис Җәббаров.
Шулай ук бу көнне һәлак булган әфганчылар рухына дога кылдылар.
Материал Рөстәм Әхмәдуллин катнашында әзерләнде.