Казанда «Булгария» теплоходы фаҗигасе турындагы «Җиденче буын» китабын тәкъдим иттеләр
Казанда Алиса Котованың («Татарстан» журналының баш мөхәррире Татьяна Вафинаның иҗади тәхәллүсе) «Җиденче буын» китабын тәкъдим иттеләр. Китапта «Булгария» теплоходы пассажирлары һәм аларның нәселенең җиденче буынга кадәрге тарихлары әдәби-нәфис формада сурәтләнгән. Бу хакта «Татар-информ» хәбәрчесе Арсений Кәримов яза.
«Мин китапны ахырына кадәр укып чыга алмадым. Ул безнең барыбыз өчен дә бик авыр фаҗигагә багышланган. Берничә тапкыр башлап карадым, әмма азагына кадәр барып җитә алмадым. Мин бу фаҗигане бик авыр кабул иттем. Мондый нәрсәләрне аңлау һәм алар турында язу мөһим дип уйлыйм. Бу китапны нәшер иткәне өчен Татьяна Вафинага рәхмәтлемен. Язучылык тормыш фәлсәфәсен һәм безнең белән булган вакыйгаларга мөнәсәбәтне формалаштырырга ярдәм итә», - дип билгеләп үтте «Татмедиа» Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев.
Ул китап авторы Татьяна Вафинаның журналист һәм язучы һөнәрен берләштерү һәм һәркайда үз укучысын табу сәләтенә аерым игътибар итте.
«Төп вакыйгадан кала барлык вакыйгалар да уйлап чыгарылган. Барлык туры килүләрне очраклы дип санагыз. Бу әдәби-нәфис китап», - дип аңлатты автор.
Шул ук вакытта Татьяна Вафина ассызыклаганча, фаҗигадән соң узган еллар дәвамында ул теплоходта исән калган пассажирлар турында бик күп мәгълүмати материаллар укыган һәм күпләр һәлакәтле сәфәргә кадәр үзләре белән булган мистик хәлләр турында сөйли, дигән нәтиҗәгә килгән.
«Кемгәдер юш килгән төш кергән, кемдер билетларын югалткан, кемдер авырып киткән яки килмәскә булган. Барысы белән дә сәфәргә чыгуга туктатып калган ниндидер гадәти булмаган нәрсәләр килеп чыккан. Һәрберсе шул хакта сөйли. Минем уйлап чыгарган геройларым да шулай ук. Алар да төрле язмыш билгеләре белән очраша. Шуңа күрә китап мистик детектив булып чыкты да», – дип өстәде язучы.
Аның сүзләренә караганда, китап баткан «Булгария»гә генә түгел, мондый фаҗига һәм һәлакәтләрнең сәбәпләренә дә багышланган. Китап үлем турында түгел, ә яшәү һәм без җаваплы булган гамәлләр турында.