Рөстәм Миңнехановка техниканы торгызу һәм экологияне яхшырту проектларын тәкъдим иттеләр
Татарстан Рәисе Рөстәм Миңнехановка кайбер перспективалы проектлар тәкъдим ителде. Ул «Татнефтехиминвест-холдинг» Директорлар советы утырышы кысаларында узды. Чарада республика Премьер-министры Алексей Песошин катнашты. Татарстан җитәкчесе матбугат хезмәте шул хакта хәбәр итә.
Татарстан белән Россия Федерациясенең башка төбәкләре компанияләре вәкилләренең эшләнмәләре экологиядән һәм энергияне сак тотудан алып сафтан чыккан җиһазларны торгызуга кадәр төрле өлкәләргә кагыла.
Казан федераль университетының Геология һәм нефть-газ технологияләре институты кафедра мөдире Михаил Варфоломеев советка аз тонналы химия өлкәсендә яңа Инженер эшләнмәләре үзәге турында сөйләде. Проект югары уку йорты базасында нефть-газ һәм катнаш тармаклар өчен гамәлгә ашырыла. Россиядә җитештерелгән чималны кулланып, тирәнтен эшкәртү өчен аз тонналы химиянең җитештерү чылбырларын булдыру планлаштырыла. Хәзер әлеге тармакларда кулланыла торган махсуслаштырылган реагентларның күбесен чит ил җитештергән. Проект ел дәвамында эшләтеп җибәрелер дип көтелә.
«Тема бик кызыклы. Бу юнәлешне үстерү бик мөһим», - диде Рөстәм Миңнеханов.
Екатеринбургның «Квантум» дәүләт корпорациясе җитәкчесе Кирилл Чинцов энергияне сакчыл тоту һәм технологияләрне яхшырту өлкәсендә инновацион технологияләр тәкъдим итте.
Татарстан Рәисе республика төзелеш, архитектура һәм торак-коммуналь хуҗалык министрлыгына дәүләт корпорациясе вәкилләре катнашында эшче төркем төзергә кушты. Аның төп максаты - Татарстанда объектларда энергияне сакчыл тоту һәм су ресурсларын экономияләү технологияләрен куллану мөмкинлеген өйрәнү.
Татарстан Хөкүмәте Йортында республика белән хезмәттәшлек перспективалары турында Мәскәүнең «Саклагыч өслекләрнең технологик системалары» ҖЧҖ генераль директоры Лев Балдаев сөйләде.
Мәскәү өлкәсенең «МД-Групп» компаниясе вәкиле Донат Гарист Aura төтен һәм ялкын мониторингы янындагы югары технологияле системаны тәкъдим итте. Детектор бер секундта 6 метр ераклыктагы ялкынны ачыкларга һәм 9 квадрат метр мәйданда төтен барлыкка килүне теркәргә сәләтле. Бу система шул исәптән «Бигеш» аэропортында, шулай ук Россиянең кайбер офис үзәкләрендә, тулай торакларда, сәнәгать предприятиеләрендә, мәгариф һәм сәламәтлек саклау объектларында кулланыла.
«Гадәттән тыш хәлләр министрлыгы һәм торак-коммуналь хуҗалык хезмәтләре белән әлеге системаны өйрәнергә кирәк. Тулаем проект кызыклы», - дип йомгаклады Татарстан Рәисе.
Соңгы проект җиһазларны торгызу турында булды. «Супервэйв Групп» компаниясе генераль директоры Виктор Силкин статистика мәгълүматларын китерде: сафтан чыккан җайланмаларның 80 процентын торгызырга мөмкин. Бу идеяне гамәлгә ашыру яңа техника, аерым алганда, телекоммуникация җиһазлары, компьютерлар сатып алуга чыгымнарны 60 процентка киметергә мөмкинлек бирәчәк.
Рөстәм Миңнеханов сүзләренчә, республикада күп төрле җиһазларны яңарту таләп ителә. Татарстан дәүләт идарәсенең цифрлы үсеш, мәгълүмати технологияләр һәм элемтә министры Айрат Хәйруллин хәбәр иткәнчә, төбәк «Супервэйв Групп» компаниясе белән эш алып бара. Шул исәптән сәламәтлек саклау өлкәсендә хезмәттәшлек итү мөмкинлеге өйрәнелә.