Дәүләт Советына сайлаулар турында мәгълүмат дәүләт архивына саклауга тапшырылачак

VII чакырылыш Татарстан Дәүләт Советына сайлаулар барышы һәм нәтиҗәләре турында мәгълүмат Татарстан Республикасының Архив эше буенча дәүләт комитетына саклауга тапшырылачак. Бу хакта бүген Казанда ТР Үзәк сайлау комиссиясе утырышында ТР Үзәк сайлау комиссиясе рәисе Андрей Кондратьев хәбәр итте.

«Кандидатларны тәкъдим итү һәм теркәүнең төп этапларында, сайлау алды агитациясе, тавыш бирү, нәтиҗә ясау этапларында шикаятьләр һәм кисәтүләр булмады. Бу безнең сайлау системасы һәм иҗтимагый институтларның җитлеккәнлеген күрсәтә», - диде Кондратьев утырышта.

Моңарчы «Татар-информ» хәбәр иткәнчә, ТР Үзәк сайлау комиссиясе беркетмәләрнең 100 процентын эшкәртүне төгәлләде. Тавыш бирүдә сайлаучыларның гомуми саныннан 71,63 проценты катнашты. Сайлау нәтиҗәләре буенча, «Бердәм Россия» бөтенроссия сәяси партиясе – 76,75 процент, КПРФ – 10,54 процент, ЛДПР – 4,41 процент, «Яңа кешеләр» – 4,21 процент, «Гадел Россия – Патриотлар – Дөреслек өчен» – 3,27 процент тавыш җыйды.