Игорь Комаров Идел буе федераль округында яшәүчеләрне Яңа ел һәм Раштуа белән котлады

Россия Президентының Идел буе федераль округындагы Тулы вәкаләтле вәкиле Игорь Комаров Идел буе федераль округына керүче төбәкләрдә яшәүчеләрне якынлашып килүче Яңа ел һәм Раштуа белән котлады.

«Кыш килде, ә аның белән бергә иң матур бәйрәмнәр башланды. Өмет һәм сөенечләр вакыты. Гаилә һәм дуслар белән бергә үткәрә торган вакыт. Якыннарга ярату һәм җылылык бүләк итү өчен мөмкинлек», - дип билгеләп үтте Тулы вәкаләтле вәкил.

«Тагын бер ел азагына якынлаша. Без сезнең белән бергә бик күп эшләр башкара алдык. Бүген Туган илебезне яклаучы, махсус хәрби операциядә катнашучыларның барысына да рәхмәт. Сез – чын геройлар. Бөтен ил сезнең белән. Ярдәм күрсәткәннәре өчен волонтерларга рәхмәт. Оборона-сәнәгать комплексында эшләүчеләргә рәхмәт. Сезнең хезмәт бүгенге көндә аеруча мөһим һәм кирәкле. Сәнәгатьчеләргә, аграрийларга, бизнесменнарга, галимнәргә, укытучыларга рәхмәт. Көн саен илебез файдасына хезмәт итүчеләрнең һәммәсенә. Идел буе федераль округының 14 төбәгендә эшләүчеләрнең барысына», — дип ассызыклады Комаров.

«Әлбәттә, махсус хәрби операциядә катнашучыларның якыннарына аерым сүзләр белән мөрәҗәгать итәргә телим. Сезнең җиңүгә, бүгенге көндә үз гомерен куркыныч астына куючы улларыгызга, абыйларыгызга һәм әтиләрегезгә ышануыгыз, һичшиксез, күптән көтелгән Җиңүне китерәчәк», - дип ышаныч белдерде ул.

«Дуслар! Узып баручы елда бердәм булып һәм үзара ярдәмләшеп яшәвебез, уртак максатка омтылуыбыз, намуслы хезмәтебез уртак киләчәгебезгә бик яхшы нигез булыр, дип ышанам», — дип өстәде Игорь Комаров.

«Барыгызга да куанычлар, уңышлар, игелек, чын дуслык һәм җылылык телим! Якынлашып килүче 2025 ел һәм Раштуа белән! Барысы да яхшы булсын!» - дип йомгаклады сүзен Президентның Идел буе федераль округындагы Тулы вәкаләтле вәкиле.