Казахстанда һәлакәткә очраган самолет, җирдән ату сәбәпле, зыян күргән
Бакудан Грозныйга рейс башкарганда һәлакәткә очраган Azerbaijan Airlines авиакомпаниясе самолеты җирдән ату нәтиҗәсендә зыян күргән.
Бу хакта интервьюда Азәрбайҗан Президенты Илһам Алиев сөйләде.
ТАСС хәбәр иткәнчә, ахыргы версия кара тартмаларны ачканнан соң билгеле булачак.
«Азәрбайҗан гражданнар самолеты Россия территориясендә, Грозный шәһәре янында тыштан зыян күргән һәм идарәсен югалткан диярлек. Без шулай ук безнең самолетның радиоэлектрон көрәш чаралары белән идарә ителмәслек хәлгә китерелүен дә беләбез. Бу самолетка китерелгән беренче зарар. Моннан тыш, җирдән ачылган ут нәтиҗәсендә самолетның койрык өлеше дә нык зыян күргән», - диде дәүләт башлыгы.