Кар яву сәбәпле, Казаннан Санкт-Петербургка очучы өч авиарейс тоткарланган
Казаннан Пулково аэропортына очучы өч авиарейс тоткарланган. Бу Казан аэропорты онлайн-таблосы мәгълүматларыннан билгеле булды.
Казаннан Санкт-Петербургка очучы рейс башта 08:30 сәгатькә планлаштырылган булган, хәзер исә аны 10:30 сәгатькә күчергәннәр. Казаннан кузгалган самолет билгеләнгән урынга 12:50 сәгатькә барып җитәчәк, дип көтелә. Моннан тыш, моңарчы 11:20 һәм 11:50 сәгатькә билгеләнгән тагын ике авиарейс 14:10 һәм 14:40 сәгатькә кадәр кичектерелгән.
Шулай ук Санкт-Петербургтан Казанга очучы ике самолет тоткарлану турында хәбәр ителә. Әлеге рейслар соңрак килеп җитәчәк: 10:20 һәм 10:50 сәгать урынына алар 13:20 һәм 13:40 сәгатьтә көтелә.
Элегрәк Росавиациядә хәбәр итүләренчә, Санкт-Петербургның Пулково аэропорты районында бүген иртән көчле кар ява. Әлеге шартларга бәйле рәвештә, Санкт-Петербургка очучы самолетлар запас аэродромнарда төшәргә мәҗбүр.