Калифорниядә янгында кимендә 24 кеше үлгән
Калифорниядә янгыннар нәтиҗәсендә кимендә 24 кеше үлгән, дип хәбәр итә BBC News, Лос-Анджелес Округының суд-медицина экспертизасы бүлеге мәгълүматларына сылтама ясап. Элегрәк 16 кеше һәлак булуы турында әйтелгән иде.
7 гыйнварда Лос-Анджелес округында чыккан урман янгыннары штат тарихында иң зуры санала. Хакимият мәгълүматларына караганда, янгыннарның гомуми мәйданы 16 мең гектардан артып китә. 12,3 меңнән артык бина, танылган кешеләрнең йортларын да кертеп, тулысынча юк ителгән. Метеорологлар сүзләренчә, утның тиз таралуына коры һәм җилле һава торышы ярдәм итә.