Данис Шакиров: Һәр елны барлык мәктәпләрне яңа дәреслек белән тәэмин итү мөмкин түгел
«Татар теле һәм әдәбияты укыткан бер мәктәп дә, кулыбызда өр-яңа дәреслек юк дип, татар теле укытмый калганы юк. Без мониторинг ясап торабыз, мөмкинлектән чыгып ярдәм итәбез.
Ә саннарга килгәндә, алар финанс мөмкинчелегеннән чыгып куелган. Һәм без аны арттыру түгел, һәр елны даими рәвештә тәэмин итү мәсьәләсен куябыз. Быел бер мәктәпкә бирелгән икән, ул бит шул мәктәптә кала һәм киләсе елда яңадан ул мәктәпне түгел, башкасын тәэмин итәбез. Башкортстан, Оренбург, Пермь кебек татарлар күп яшәгән һәр авылга да ел саен яңа дәреслек китереп булмый. Кемгәдер җитмәсә, электрон дәреслек мөмкинлеге бар.
Ә инде Мәгариф һәм фән министрлыгы әйткән 30 процент дигәндә, яңа линейкада яңа чыккан дәреслек турында сүз бара. Әле бит мәктәпләрдә берничә ел кулланылган дәреслек булырга мөмкин, алар ФГОС стандартларына туры килә икән, алар белән алга таба да укытырга ярый. Һәр елны барлык мәктәпләрне яңа дәреслек белән тәэмин итү мөмкин түгел. Хәзер без аны арттыра алмыйбыз. Чөнки ул акчалар дәүләт программасын кабул иткәндә үк салынган була», – ди ул.
Россиянең татарлар яшәгән регионнарын татар теле һәм әдәбияты дәреслекләре белән тәэмин итүгә бәйле вазгыять турында «Интертат» сайты өчен Рузилә Мөхәммәтова язды.
- Татар теле дәреслеге турында: Сиңа җитте, миңа җитмәде, яки Барыбызга да җиткереп буламы?