Зөһрә Сәхабиева: Матди хәлемне кайгыртыйм әле, дип җырлаучылардан мәңге җырчы чыкмаячак!

«Менә бер көн, берничә ай җырлыйм әле, матди хәлемне кайгыртыйм әле, дип җырлаучылардан мәңге җырчы чыкмаячак! «Соңыннан бизнеска китәм» диючеләре дә бар. Аларның үсеше булмый. Милләтемә, мәдәниятемә файда китерим, дип җырларга кирәк.

Җырчылар «чыштык-пыштык» җырлар белән халкыбызны, мәдәни сулышыбызны оятка гына калдыра ала! Үзеңне танытуның юлы бер – чын сәнгать кешесе булу. Ә халкыңны «недоразумение», «патология» кебек җырлар җырлап, клиплар төшереп адәм мәсхәрәсенә калдыру бик җиңел. Бүгенге көндә яңгыраган җырлар – җыр әсәрләре түгел күбесе! Алар халыкка да, тарихка да зыян гына сала алалар бит.

Без Совет чорына да, әлеге заманга да эләктек. Хәзерге вакытта бит клиплар күбрәк интернетта популярлык яулый. Әмма аларның да югары дәрәҗәдә булулары зарур. Алар сәнгать әсәре булсын иде. Безгә аларның кирәге булмады, чөнки гел халык, тамашачылар арасында идек. Телевидениедә, радиода даими эшләдек. Бик күп эшләдек. Без тулы концертлар яздырдык, алар ТВ «Алтын фонд» архивына кереп калды. Саклансыннар гына! Күрсәтеп торалар», – ди ул.

«Илһам чишмәсе» исемендәге V төбәкара җыр бәйгесенең I этабыннан репортажны «Интертат» сайты өчен Юлай Низаев язды.

• «Илһам чишмәсе» бәйгесендә: «Чыштык-пыштык җырлар халкыбызны оятка гына калдыра ала!»