Шаляпин стипендиясенә гаризалар кабул итү башланды
Татарстан Республикасы Милли музее һәм аның филиалы – Горький һәм Шаляпин музее 2025 елның иң яхшы яшь вокалистлары арасында Шаляпин стипендиясенә конкурс игълан итә.
«Михаил Казаков, Алексей Тихомиров, Аида Гарифуллина, Дамир Закиров, Владимир Васильев, Игорь Макаров, Динар Шәрәфетдинов һәм башка талантлы вокалистлар төрле елларда стипендиягә ия булды. Аларның күбесе Россия опера сәхнәсенең горурлыгы, дөньяның әйдәп баручы концерт мәйданчыкларында чыгыш ясый», - дип хәбәр итә Татарстан Милли музее матбугат хезмәте.
Быел номинацияләү шартлары үзгәргән. Конкурста яшь башкаручылар – махсуслаштырылган музыка мәктәпләренең һәм өстәмә белем бирү мәктәпләренең, урта махсус уку йортларының (музыка училищелары, музыка көллиятләре), югары уку йортларының (консерватория, институт, академия, университет) 15 яшьтән 25 яшькә кадәрге өлкән сыйныф укучылары катнаша ала. Узган елларның җиңүчеләре кабат стипендиягә номинацияләнергә хокуклы түгел, диелә хәбәрдә.
Кандидатларны Шаляпин стипендиясенә тәкъдим итүне профильле мәгариф учреждениеләре, концерт оешмалары, иҗат берлекләре үткәрә. Номинантларны оештыру комитеты билгеләячәк. Гаризалар 27 гыйнварга кадәр marian_74@mail.ru электрон адресына кабул ителә. Конкурста катнашу өчен мәгариф учреждениесеннән характеристика, ике видеоязма җибәрергә кирәк. Опера сәхнәсе өчен башкарылган әсәрнең булуы шарт.
- Шаляпин стипендиясе – 1912 елда опера җырчысы Федор Шаляпин нигез салган традициянең символик дәвамы. Россиягә соңгы килүендә Федор Шаляпин алтынчы шәһәр башлангыч училищесының иң яхшы укучысына исемле стипендия булдырган. 1997 елдан бу традицияне Горькийның әдәби-мемориаль музеенда (хәзер Горький һәм Шаляпин музее) торгызганнар.