Фәрит Мөхәммәтшин: Минтимер Шәймиев Татарстанны бөтен дөньяга таныткан кеше

Татарстан Дәүләт Советы Рәисе Фәрит Мөхәммәтшин телеграм-каналында Татарстан Дәүләт Киңәшчесе, Татарстанның беренче Президенты Минтимер Шәймиевне туган көне белән котлады.

«Бүген республиканың Дәүләт Киңәшчесе, Россия Хезмәт Герое, танылган дәүләт һәм җәмәгать эшлеклесе, бәхәссез авторитетка һәм хөрмәткә ия шәхес, Татарстанның беренче Президенты, республиканы бөтен дөньяга таныткан кеше - Минтимер Шәрип улы Шәймиев туган көнен билгеләп үтә.

Безнең барыбыз өчен дә Сез, хөрмәтле Минтимер Шәрипович, зирәк һәм гадел остаз, тәҗрибәле киңәшче һәм шәхси үрнәк, үзенең бөтен тормышын туган республикабызга һәм аның күпмилләтле халкына багышлаган җитәкче булып каласыз. Һичшиксез, Татарстанның илебездәге иң алдынгы, тотрыклы үсеш кичерүче, үзенең милли һәм дини татулыгы белән көчле төбәк булып танылуы Сезнең эшчәнлек белән бәйле. Халкыбызның лаеклы улы буларак Сез әле бүген дә республикабыз хакына фидакарь хезмәтегезне дәвам итәсез.

Әлеге истәлекле көндә Сезгә туганнарыгыз һәм якыннарыгыз, хезмәттәшләрегез һәм дусларыгыз иң җылы, ихлас теләкләрен белдерә. Чын йөрәктән әйтелгән шундый матур котлауларга мин дә кушылам. Туган көнегез белән, Минтимер Шәрипович! Сезгә озын гомер, нык сәламәтлек, уңышлар һәм иминлек телим!» - диелә котлауда.