Татарстанда ике мең укытучы һәм меңнән артык тәрбияче җитми

Татарстанның мәгариф һәм фән министры Илсур Һадиуллин республика мәктәпләрендә ике мең укытучы, балалар бакчаларында меңнән артык тәрбияче җитмәвен әйтте.

«Барыннан да бигрәк математика (344 педагог), рус теле (334), башлангыч сыйныфлар (310), чит тел (180), физика (124), тарих (94), информатика (86) һәм химия (77) укытучылары кирәк. Укытучыларга ихтыяҗ Казанда һәм Чаллыда, Түбән Кама, Биектау, Лаеш һәм Әлмәт районнарында зур», - дип билгеләп үтте ул Казандагы һөнәри әзерлек үзәгендә матбугат очрашуында.

Илсур Һадиуллин узган ел Татарстан мәктәпләренә меңгә якын яшь укытучы эшкә килгәнен искәртте. «Әмма мәгариф оешмасында бер ел эшләгәннән соң, мондый белгечләрнең 23 проценты китеп бара, өч ел эшләгәннән соң – 30 проценттан артык белгеч эшеннән китә. Бу саннар безне шатландырмый, шуңа күрә бу мәсьәләне федераль дәрәҗәдә хәл итәргә кирәк», - диде ул.

«Яшь укытучыларга ярдәм итүнең аерым программасы булырга тиеш, без бу хакта әйткәнебез булды. Алар эш урыннарыннан бер дә китмичә эшләсен өчен, законны үзгәртергә кирәк. Әгәр студентлар республика югары уку йортларында бюджет хисабына белем алсалар, димәк, берничә ел республиканың мәгариф учрежденияләрендә эшләргә тиешләр. Элек шулай иде бит», - диде министр.

Аның фикеренчә, әгәр бу тәҗрибәне кире кайтармасалар, проблема хәл ителмәячәк. «Өч ел дәвамында булса да алар мәгариф системасында эшләргә тиеш. Ул вакытта алар эш урыннарында калырлар иде, чөнки укыту һәм тәрбия процессына җәлеп итү үзе бер кызыклы процесс», – дип өметләнә ул.

«Республиканың белем бирү оешмасына эшкә урнашкач, яшь укытучылар өч ел дәвамында 3,5 мең сумнан артык өстәмә түләү ала. Бу зур сумма түгел. Алар ким дигәндә 7,5 мең – 10 мең сум алырга тиеш. Бу мәсьәлә буенча фикер алышабыз. Татарстан мәгариф системасында 76 меңнән артык педагог эшли, шул исәптән 32 меңнән артык мәктәп укытучысы», - диде Илсур Һадиуллин.