Айзатуллин: 2025 елга Татарстанда торакны файдалануга тапшыру буенча минималь план 3,26 м
2025 елга Татарстанда торакны файдалануга тапшыру буенча минималь план 3,26 млн кв. м тәшкил итә. Бу хакта Татарстан Республикасы Хөкүмәте Йортында узган киңәшмәдә республиканың Төзелеш, архитектура һәм торак-коммуналь хуҗалык министрлыгы башлыгы Марат Айзатуллин хәбәр итте. Киңәшмәне ТР Рәисе Рөстәм Миңнеханов үткәрде. Бу хакта Татарстан лидерының матбугат хезмәтендә хәбәр иттеләр.
«Аның 1 млн 416 мең кв.м шәхси торак төзелеше линиясе буенча, 1 млн 683 мең кв. м күп фатирлы инвестицион торак сегментында һәм 162 мең кв. м социаль ипотека программасы буенча файдалануга тапшырылачак. Бу 3274 фатирлы 35 йорт була», - диелә хәбәрдә.
Татарстанда республикада яшәүчеләрнең аерым категорияләрен торак белән тәэмин итү буенча 4 программаны гамәлгә ашыру планлаштырыла. Агымдагы елда 5 һәм аннан да күбрәк баласы булган 24 күп балалы гаилә, шулай ук 66 яшь гаилә һәм мәҗбүри күчеп килүчеләр, Ерак Төньяктан күчеп килүчеләр һәм чернобыльчеләр арасыннан өч гаилә торак алачак. Якынча мәгълүматлар буенча, ятим балаларны торак белән тәэмин итү буенча 450 фатир сайлаганнар.
Мәгариф тармагында 2025 елда 11 объект төзү планлаштырыла. Аерым алганда, Чаллы, Казан, Әгерҗе, Минзәлә, Буада яңа мәктәпләр һәм Кукмарада узган елдан калган башлангыч сыйныфлар бинасы төзеләчәк. Төзелеш «Яшьләр һәм балалар» илкүләм проекты һәм «Авыл территорияләрен комплекслы үстерү» дәүләт программасы кысаларында гамәлгә ашырылачак. Шулай ук республикада 4 яңа балалар бакчасы барлыкка киләчәк һәм Апас бистәсендә күчмә балалар бакчасы төзелеше дәвам итәчәк, учреждениеләр «Гаилә» илкүләм проектына һәм «Авыл территорияләрен комплекслы үстерү» дәүләт программасына кертелгән.
«Сәламәтлек саклау» тармагы буенча 53 объект төзү планлаштырыла. Шуларның 51е медицинаның беренчел звеносына карый. Алар – Казанда һәм Әлмәттә 2 гомуми практика табиблары үзәге һәм Татарстан башкаласында «Озын һәм актив тормыш» илкүләм проектына кергән ике поликлиника. Шулай ук республикада 47 фельдшер-акушерлык пункты төзеләчәк. Шулардан 13 объект республика программасына (алар буенча контрактация февраль ахырына кадәр узарга тиеш) һәм 34 объект илкүләм проектка керә.
Спорт линиясе буенча бер республика һәм бер дәүләт программасы кысаларында 23 объект төзелергә тиеш. Алар - 4 ябык футбол манежы һәм 18 универсаль спорт мәйданчыгы, шулай ук былтыр төзелә башлаган объект – Футболны үстерү үзәге төзелеше. Бүгенге көндә соңгысында эшнең 24 проценты башкарылган.
«Мәдәният» тармагында «Авыл территорияләрен комплекслы үстерү» дәүләт программасы буенча өч муниципаль берәмлектә дүрт объект төзү планлаштырыла.
«Гаилә» илкүләм проекты кысаларында Яшел Үзән районында картлар һәм инвалидлар өчен интернат-йорт төзү дәвам итә. Хәзерге вакытта объектта төзелеш эшләре 37 процентка башкарылган. Социаль инфраструктура төзелеше буенча башка республика программалары кысаларында агымдагы елда 25 объект төзү планлаштырылган.