Татарстан китап нәшриятының ГУМдагы кибете ябылган

Татарстан китап нәшриятының Казанның ГУМ сәүдә үзәгендәге (Бауман урамы) кибете ябылган. Татарстан китап нәшрияты директоры Илдар Сәгъдәтшин «Татар-информ» хәбәрчесенә кибетнең яңа урынга күчереләчәген әйтте.

«Бауман урамы, 19 һәм Декабристлар урамы, 2 адресы буенча урнашкан башка кибетләр белән чагыштырма анализ үткәрдек. Нәтиҗәдә, ГУМдагы сатулар шактый калыша, дигән фикергә килдек, бу үзгәрешләр кирәклеген раслый. Без кибеткә йөрүчеләрнең фикерен исәпкә алдык, өйрәндек, аларның күбесе китап уку һәм сатып алу өчен уңайлырак һәм кызыклырак урын эзләвен әйтте», - диде ул.

Илдар Сәгъдәтшин әлеге мәгълүматлар нигезендә ГУМда Татарстан китап нәшрияты кибете ябылу – китаплар сатуга карашны яңадан аңлау һәм укучылар өчен тагын да кызыклырак формат булдыру өчен кирәкле адым, дигән нәтиҗәгә килгәнен әйтте. Аның әйтүенчә, ГУМ сәүдә үзәгендәге Татарстан китап нәшрияты кибетенә килүчеләр санын анализлаганнар.

«Кибетне күчерү турындагы карар әлеге сәүдә ноктасы эшчәнлегенең нәтиҗәлелеген бәяләү өчен үткәрелгән җентекле тикшерүдән соң кабул ителде. Кибет якын арада башка җирдә ачылырга тиеш, яңалыкларны күзәтеп барыгыз. Без уңайлырак һәм җайлырак урын таптык. Хәзерге вакытта күченү процессы бара. Бауман урамында кибетебез бар, бер урамда ике кибет тоту да коммерция ягыннан бик үк дөрес түгел», - дип аңлатты Илдар Сәгъдәтшин «Татар-информ»га.

Илдар Сәгъдәтшин яңа урындагы кибеттә мөмкинлекләр күбрәк булачак, дип әйтте.

«Татарстан китап нәшрияты нияте – уңайлырак урында яңа китап кибете ачу, ул безнең укучыларга тагын да шартлар тәэмин итәчәк. Яңа сәүдә киңлегендә китап кибете генә түгел, сатып алучылар өчен күп кенә өстәмә мөмкинлекләр дә булачак. Килүчеләргә без уку өчен уңайлы урыннар, авторлар белән очрашулар, өлкәннәр һәм балалар өчен кызыклы программалар, татар әдәбиятын урнаштыру өчен тагын да күбрәк мәйданнар тәкъдим итәчәкбез», - диде Татарстан китап нәшрияты директоры.

Фото: © «Татар-информ», Солтан Исхаков