Гидрометеорология үзәге башлыгы Татарстанда аномаль җылы декада булуы турында кисәтте

Татарстанда агымдагы атнада аномаль җылылык көтелә. Гыйнвар азагында һәм февральнең беренче көннәрендә республикада көндезге сәгатьләрдә һава температурасы уңай була, дип хәбәр итте «Татар-информ»га ТР Гидрометеорология үзәге башлыгы Феликс Гоголь.

«Якындагы көннәрдә, шул исәптән якшәмбе, температура көндез уңай була – +1..+2 градус. Төнлә исә нуль яки зур булмаган тискәре күрсәткечләр көтелә. Температура климатик нормадан 10 градуска югарырак була. Аномаль җылылык безнең территориягә Атлантикадан циклоннар килү белән бәйле», – диде ул.

Гыйнварның беренче декадасы климатик нормадан 7-9 градуска җылырак, ә икенче декадада исә температура нормадан 4-6 градуска югарырак булды, дип өстәде Гоголь. Өченче декада түбән температурадан башланды, әмма аннан соң килгән җылы көннәр бу салкынлыкны киметә. Нәтиҗәдә, гыйнвар ае тулысынча климатик нормадан күпкә җылырак була.