Фәрит Мөхәммәтшин мәгълүмат чараларына төбәк тормышын гадел яктыртырга йөкләмә бирде
Татарстан Дәүләт Советы Рәисе Фәрит Мөхәммәтшин республика массакүләм мәгълүмат чараларына төбәктәге тормышны гадел һәм вакытында яктыртырга кушты. Бу хакта ул «Татмедиа» Республика матбугат һәм массакүләм коммуникацияләр агентлыгының Казан IT-паркында узган йомгаклау коллегиясендә әйтте.
«Сезнең бурыч – Татарстанда гамәлгә ашырыла торган эшләрне вакытында, намуслы һәм дөресен сөйләү, күрсәтү һәм яктырту», - диде Фәрит Мөхәммәтшин.
«Татмедиа» республика агентлыгының 2024 елдагы эш нәтиҗәләрен ул уңай бәяләде.
«Тулаем алганда куелган бурычлар үтәлгән. Бу бит авыр вакытта. Ә безнең җиңел вакытларыбыз булмады. Пандемия, махсус хәрби операция һәм башкалар. Авыр заманнарда сез хакимият, халык белән бергә булдыгыз. Сезнең аркылы без үзебезнең кешеләргә, Татарстан Республикасы гражданнарына мәгълүматны җиткерә алдык», - диде ул медиа тармак вәкилләренә.