Фәрит Мөхәммәтшин: Татарстанда муниципаль берәмлекләрнең мөһимлеген аңлыйлар

Татарстанда муниципаль берәмлекләрнең республика структурасындагы мөһимлеген, кечкенә торак пунктларны үстерергә, аларны төзекләндерергә кирәклеген аңлау дәүләт әһәмиятенә ия. Республика җитәкчелеге һәм дәүләт хакимиятенең барлык органнары моңа аерым игътибар бирә. Бу хакта «Кече Ватан – Россиянең көче» II бөтенроссия муниципаль форумының икенче көне кысаларында журналистлар белән сөйләшкәндә ТР Дәүләт Советы Рәисе Фәрит Мөхәммәтшин белдерде.

«Саннар атамыйм, әмма шуны әйтәм, без бүген кечкенә шәһәрләрдәге һәм башкаладагы тормыш дәрәҗәсен тигезләү, торак төзү, торак пунктларны, ишегалларын төзекләндерү өлкәсендә зур бурычларны хәл иттек. Юллар, автобусларда йөртү һәм башка зур бурычларның чишелеше табылды», - дип билгеләде Мөхәммәтшин.

Ул шулай ук ассызыклаганча, форумның региональ көне тәмамланганнан соң республика җитәкчелеге уңайлы шәһәр мохитен булдыру һәм иҗтимагый киңлекләрне үстерү өлкәсендәге эшчәнлеген тагын бер кат анализлаячак.

«Хакимият органнары эшчәнлегенең бу юнәлешенә игътибар артачак», - дип йомгаклады ТР Дәүләт Советы Рәисе.

Татарстан Рәисе Рөстәм Миңнеханов Россия Федерациясе Дәүләт Советының «Тормыш өчен инфраструктура» юнәлеше буенча комиссиясен җитәкли. Комиссия шул ук исемдәге илкүләм проектка кураторлык итә. Проектның максаты – торак пунктларны комплекслы үстерү. Бу торак биналар һәм юллар төзү һәм ремонтлау, җәмәгать һәм ишегалды киңлекләрен төзекләндерү, барлык кирәкле социаль һәм коммуналь инфраструктураны булдыру һәм яңарту, җәмәгать транспортының хәрәкәт составын яңарту ярдәмендә уңайлы маршрутлар санын арттыру.