Татарстанда «Җиңүгә кадәр 80 көн» акциясе башлана
Бөек Ватан сугышында Җиңүнең 80 еллыгы елында Татарстанда күмәк яшьләр чаралары планлаштырылган. Шуларның берсе «Җиңүгә кадәр 80 көн» акциясе була, ул 19 февральдә башлана. Бу хакта Татарстан Яшьләр эшләре министрлыгының йомгаклау коллегиясендә ведомство җитәкчесе Ринат Садыйков хәбәр итте.
«Акция кысаларында көндәлек форматта яшьләр арасында тарихи хәтерне саклауга, Кызыл Армия Геройлары һәм сугышчылары, совет халкының хезмәт батырлыгы, буыннар дәвамчанлыгы турындагы истәлекне мәңгеләштерүгә юнәлдерелгән төрле планлы чаралар узачак», - дип аңлатты министр.
«Җиңүгә кадәр 80 көн» акциясе 9 майда Казанның Меңьеллык мәйданында хәрби-патриотик тәрбия учреждениеләре, хәрби техника һәм оборона өлкәсе предприятиеләренең казанышлары күргәзмәсе белән тәмамлана.
Татарстан яшьләре хәзердән Җиңү юбилеена багышланган чаралар көн тәртибенә керә башлады. Телеграм-каналларда көн саен бәрелешләр һәм геройлар турында фактлар, шәхси архивлардан алынган вакыйгалар, ветераннар һәм тыл хезмәтчәннәре истәлекләре, чаралар һәм акцияләр турында мәгълүмат һәм башкалар урнаштырыла. Шулай ук гыйнварда «Карлы десант Россия студентлар отряды. Җиңү десанты» акциясенә старт бирелде», - дип дәвам итте министр.
Киләчәктә «Хәтер вахтасы» акциясенә старт бирелә. Аның кысаларында Татарстанның эзләү отрядлары Кызыл армия сугышчыларының һәлак булган һәм җәсадлары җирләнгән урыннарын билгеләү, шулай ук совет солдатларының табылган медальоннарын туганнарына тапшыру өчен экспедициягә китәчәк.
Шулай ук традициягә әйләнгән чаралар «Георгий тасмасы», «Кызыл канәфер», «Җиңү диктанты» һәм башкалар узачак.