Татарстанда Чирмешән ныгытмасын мәдәни мирас объекты итеп таныячаклар
Чирмешәннең 1732-1736 елларда төзелгән ныгытмасын төбәк әһәмиятендәге мәдәни мирас объекты дип таныйлар һәм тиешле реестрга кертәчәкләр. Татарстан Мәдәни мирас объектларын саклау комитеты боерыгы проекты әлегә коррупциягә каршы экспертиза уза.
Объект Чирмешән авылы территориясендә Совет урамы тирәсендә урнашкан. Ныгытма туфрак өеменнән гыйбарәт, ул планда 100х100 метрлы квадрат дүртпочмак хасил итә. Почмакларда манара нигезләре калдыклары сакланган.
Ныгытма Яңа Кама аръягы оборона линиясенең бер өлеше булган. 1735 елга анда 4 рота урнаша.
Элек шулай ук Чирмешәннән 9,1 чакрым ераклыкта урнашкан Чирмешән валының участогы (XVIII гасырда төзелгән) мәдәни мирас объекты дип танылган.
«Татар-информ» хәбәр иткәнчә, Чирмешәннең дизайн-кодын эшләү барышында Чирмешән ныгытмасы образы логотип ясаганда кулланылган.