Арча суды «Гайлэм» маркалы тортлар чыгаруны тыйды

Арча районында суд продуктның тулы составын һәм җитештерү датасын күрсәтмичә «Гайлэм» маркалы тортлар чыгаруны тыйды. Бу хакта Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) ТР буенча идарәсе матбугат хезмәте хәбәр итә.

Әлеге карар Роспотребнадзор эшмәкәрнең товарлар тышына барлык тиешле мәгълүматны күрсәтмәвен ачыклаганнан соң кабул ителде. Ведомство Арча судына дәгъва белән мөрәҗәгать итте, суд барлык таләпләрне канәгатьләндерде.

Суд тортларны тулы һәм дөрес мәгълүмат күрсәтмичә чыгаруны тыйды, шулай ук азык-төлек продукциясенең составы һәм җитештерү датасы турында тулы һәм дөрес мәгълүмат күрсәтүне тәэмин итүне йөкләде.