Питрәч районында мәдәният йорты җитәкчесе «Шәфкатьлелек» алтын медаленә лаек булды
Татарстанның Питрәч районы Чыты авылы мәдәният йорты директоры, блогер һәм волонтер Миңнур Шәмсетдинов «Шәфкатьлелек» алтын медаленә лаек булды. Аңа бүләкне «Европа-Азия» Халыкара гуманитар академия президенты, Дөнья мәдәнияте институты (ЮНЕСКО) ректоры, Гомуми тынычлык өчен федерациясе тынычлык илчесе, академик Энгель Таһиров тапшырды. Бүләкләү тантанасы Чыты авылында Миңнур Шәмсетдиновның 20 еллык һөнәри эшчәнлегенә багышланган иҗат кичәсендә булды.
Энгель Таһиров билгеләп үткәнчә, әлеге медаль татар халкының традицияләрен саклау һәм үстерүгә, шулай ук Татарстанның рухи потенциалын ныгытуга өлеш керткән өчен тапшырыла. Аның сүзләренчә, бу бүләк иң яхшы кешелек сыйфатларын гәүдәләндерә, аның хуҗасы күркәм идея хакына бөтен энергиясен бирүенә дәлил булып тора.
«Әгәр без авылны Миңнур кебек сакларга тырышсак, татар халкы мәңге яшәячәк», - дигән ышаныч белдерде Энгель Таһиров.
Фото: © Люция Сиразиева тарафыннан тәкъдим ителде
Камал театры актеры, Россиянең һәм Татарстанның халык артисты Равил Шәрәфиев тә аңа теләктәшлек белдерде. Ул Миңнур белән әле күптән түгел генә танышуын, ә аның хакында белгәч, бу егетне шунда ук яратуын әйтте.
«Ул туган авылын ташлап китмәгән. Шуның өчен генә дә аңа карата хөрмәтем зур, тәүге караштан, беренче сөйләшүдән соң ук аны яраттым», - диде ул.