Тикшерүчеләр «Крокус»тагы теракт турындагы җинаять эшен тикшерүне төгәлләде
Россия Тикшерү комитеты Мәскәү өлкәсенең Красногорскидагы «Крокус Сити Холл» концерт залында теракт турындагы җинаять эшен тикшерүне тәмамлады. Бу хакта ТАССка адвокат Олег Власов хәбәр итте.
Хәзер алар эш материаллары белән таныша башлый.
«Бу эш буенча тикшерү тәмамланды, алар аның материаллары белән танышырга кереште. Закон буенча моны беренче булып зыян күрүчеләр эшли, ә алар анда меңгә якын кеше. Шулай булгач, эшне судка тиз генә тапшырулары икеле», - диде юрист.
«Крокус Сити Холл»га һөҗүм 2024 елның 22 мартында булды. Теракт нәтиҗәсендә 140тан артык кеше һәлак булды, 550дән артык кеше зыян күрде.
Тикшерү вакытында 20 кеше тоткарланган, шул исәптән терактны башкаручы дип шикләнелгән 4 кеше - Мөхәммәдсобир Фәйзов, Далерджон Мирзоев, Саидакрами Рачабализода һәм Шәмсидин Фәридуни.