Марат Җәббаров: Сөтне сатып алу бәясе бер елда уртача 37 процентка артты
2024 елда Татарстанда, шул исәптән кече хуҗалык формаларында да, сөтне сатып алу бәясе арткан. Бүгенге көндә аның уртача бәясе 36 сум 16 тиен тәшкил итә, бу узган елга караганда 37 процентка артыграк. ТР авыл хуҗалыгы һәм азык-төлек министры Марат Җәббаров республика Хөкүмәте йортында Татарстан Рәисе Рөстәм Миңнеханов үткәргән киңәшмәдә шулай дип белдерде.
Ул билгеләп үткәнчә, бәя төрле районда төрлечә. Әйтик, Балтач, Биектау, Арча һәм Кукмара районнарында сөтне сатып алу бәясе иң югары булса, Лениногорск, Яшел Үзән, Чүпрәле һәм Апас районнарында ул иң түбәне.
Министр аңлатып үткәнчә, шәхси ярдәмче хуҗалыкларда төп керем мөгезле эре терлек асрау хисабына тәэмин ителә. Ел башына мөгезле эре терлек, шул исәптән сыерларның саны 315 мең 104 баш булган, бу узган елга караганда 33,3 меңгә кимрәк. Иң күп югалтулар – Чүпрәле, Нурлат, Питрәч һәм Кукмара районнарында. Бөгелмә һәм Чистай районнарында исә мөгезле эре терлек саны арткан.
«Сыерларның баш саны кимү электрон хуҗалык кенәгәсе мәгълүматларын актуальләштерү, шулай ук 2023 елдагы бәяләр, катлаулы климат шартларының нәтиҗәләре белән бәйле», - дип өстәде Җәббаров.