Икътисадчы Үзәк банк төп ставканы үзгәртү турында фараз ясады

Россия Банкы, мөгаен, төп ставканы үзгәртмәс – 21 процент дәрәҗәсендә калдырыр. Бу хакта икътисадчы, Россия Эшмәкәрләр һәм арендаторлар берлеге башлыгы Андрей Бунич белдерде, дип хәбәр итә «Радио 1».

«[Эльвира] Нәбиуллинаның сүзләреннән чыгып, ставка арттырылмаячак, дип уйлыйм. Хәзерге вакытта моңа нигез юк, чөнки кредитлау дәвам итү күзәтелми. Кредитлау кинәт кимеде һәм артмый», - дип билгеләде белгеч.

«Моннан тыш, бүгенге көндә инфляция артуны дәлилләүче мәгълүматлар юк. Әлбәттә, аның кимүе турында мәгълүматлар да юк. Ягъни, мәгълүмат каршылыклы. Мондый шартларда Үзәк банк, мөгаен, кискен хәрәкәтләр ясамас», - дип фаразлады ул.

Бунич фикеренчә, инфляция арту дәвам итә, әмма ул, мөгаен, инде иң югары ноктага җиткәндер. «Инфляция кими башлауга ук, Үзәк банк ставканы киметәчәк, дип ышанам. Бу бәлки киләсе утырышта яки бер утырыштан соң булыр», - дип өстәде ул.

Үзәк банк директорлар советының соңгы утырышы 2024 елның декабрендә узды. Аналитиклар регулятор ставканы 23-25 процентка кадәр арттырачак, дип фаразлауга карамастан, төп ставка үзгәрешсез калдырылды. Киләсе утырыш 14 февральгә билгеләнгән.