Татарстан Тулы вәкаләтле вәкиллеге һәм Казан мәдәният институты уртак проектлар әзерли
Казан дәүләт мәдәният институты Татарстанның Россия Федерациясендәге Тулы вәкаләтле вәкиллеге белән берлектә фән, мәгариф һәм мәдәният өлкәләрендә зур проектлар гамәлгә ашырырга планлаштыра. Бу хакта югары уку йортының ректоры Роза Әхмәдиева «Россия 24/Татарстан» телеканалына биргән интервьюда сөйләде.
Шулай ук махсус операция хәрбиләренә һәм аларның гаиләләренә зур игътибар бирү планлаштырыла. Моннан тыш, Казан мәдәният институты «Безнен заман» фестивалендә катнашкан «Юл хәрәкәте иминлеге» дәүләт бюджет учреждениесе коллективы белән берлектә Мәскәүдә концерт оештырырга ниятли.
«Татарстан Тулы вәкаләтле вәкиллеге белән берлектә ел дәвамында төрле чаралар үткәрәчәкбез. Шуларның берсе – Мәскәүдә куелачак концерт. Без анда «Безнен заман» фестивалендә катнашкан «Юл хәрәкәте иминлеге» дәүләт бюджет учреждениесе коллективы белән бергә барырга уйлыйбыз. Эшче яшьләр, профессиональ артистлар бергәләп Россия башкаласында Татарстан мәдәниятен күрсәтәчәк. Тамашачылар арасында безнең уку йортын тәмамлаган һәм хәзер Мәскәүдә яшәүче һәм төрле өлкәләрдә эшләүче кешеләр дә булачак», – дип билгеләде Әхмәдиева.