Россия укучыларының әти-әниләре БДИ тапшырып карады
Россия мәктәп укучыларының әти-әниләре «Бергәләп тапшырабыз. Әти-әниләр БДИ тапшыру көне» акциясе кысаларында Бердәм дәүләт имтиханын тапшырып карады, дип хәбәр итә РИА Новости хәбәрчесе.
Әти-әниләргә Мәскәү мәктәпләренең берсендә база дәрәҗәсендәге математикадан БДИ тапшырырга тәкъдим ителде.
«Әлбәттә, әти-әниләрнең, гаиләнең ролен киметергә ярамый. Алар чыгарылыш сыйныф укучыларыбыз имтиханнарга әзерләнә торган мохиткә йогынты ясый», - диде Мәгариф һәм фән өлкәсендә күзәтчелек буенча федераль хезмәт (Рособрнадзор) башлыгы урынбасары Игорь Круглинский. Ул акция Мәскәүдә башлап җибәрелде, ә алга таба анда Россиянең барлык субъектлары катнашырга тиеш, дип билгеләп үтте.
Моннан тыш, акциядә Берләшкән Гарәп Әмирлекләренең Мәгариф министрлыгы делегациясе дә булды. Алар Россиягә мәктәпләрдә белем бирү тәртибен һәм дәүләт йомгаклау аттестациясе системасын оештыру тәҗрибәсен өйрәнү максаты белән килде.
«Бергәләп тапшырабыз. Әти-әниләр БДИ тапшыру көне» акциясе ата-аналар имтиханда үзләре катнашып карый, БДИ кагыйдәләре һәм процедурасы белән үз тәҗрибәсендә таныша алсын, ә аннан соң имтиханны тапшыруның барлык нечкәлекләрен балаларына аңлата алсын өчен үткәрелә. Мондый эксперимент ел саен Россиянең барлык төбәкләрендә үткәрелә.